ရေနွေးပူထဲ ငရုတ်မှုန့်ထည့်သောက်ပြီး နှလုံးဖောက်တာကို ကယ်တင်နိုင်တယ်ဆိုတဲ့ ကုထုံးအမှား ပျံ့နှံ့
- ဤဆောင်းပါးသည် သက်တမ်းတစ်နှစ်ကျော် ရှိနေပြီဖြစ်သည်။
- ပုံနှိပ်ဖော်ပြသည့်နေ့စွဲ 29 နိုဝင်ဘာ 2022 အချိန် 07h25
- ဖတ်ရန် ကြာချိန် 1 မိနစ်
- AFP ထိုင်း
AFP © မူပိုင်ခွင့် ၂၀၁၇-၂၀၂၅။ ဤစာမူကို စီးပွားဖြစ် အသုံးပြုမည်ဆိုပါက လစဉ်/နှစ်စဉ်ကြေး ပေးသွင်းရန် လိုအပ်ပါသည်။ ပိုမိုသိရှိရန် ဤနေရာကို နှိပ်ပါ။
“ရုတ်တရက် နှလုံးထဖောက် ( Heart Attack)ဖြစ်နေသူကို ချက်ချင်း ကယ်တင်နိုင်မယ့်နည်းလမ်း”(မူရင်းအတိုင်း) လို့ ခေါင်းစဉ်တပ်ထားတဲ့ ဒီပို့စ်ကို ၂၀၂၂ ခုနှစ်၊ နိုဝင်ဘာ ၂၁ ရက်က အဖွဲ့ဝင် ၁.၇ သန်းရှိတဲ့ Facebook Group တစ်ခုမှာ တင်ခဲ့တာပါ။
အဲဒီပြောဆိုမှုကို ငရုတ်သီးတွေ၊ ရေနွေးကြမ်းခွက်ပုံတွေနဲ့အတူ မျှဝေထားပါတယ်။
Burma Thadin လို့ နာမည်ပေးထားပြီး ကြည့်ရှုသူများအောင် မမှန်ကန်သောအချက်အလက်တွေနဲ့ လုပ်ကြံဖန်တီးထားတဲ့ပို့စ်တွေတင်တဲ့ (clickbait) ဘလော့ဂ်တစ်ခုမှာ အဲဒီပို့စ်ကို တင်ခဲ့တာဖြစ်ပါတယ်။
ပို့စ်မှာ အောက်ပါအတိုင်း တစိတ်တပိုင်းရေးထားပါတယ်။
“နှလုံးရောဂါဖောက်တြ့အခါ နှလုံးပြန်လည်အလုပ်လုပ်ဖို့အတွက် တကယ့်အစာအဟာရကဲ့သို့ စွမ်းဆောင်ပေးနိုင်၎င်းဘ့်အရာကို ချက်ခြင်းပံ့ပိုးဖို့လိုပါတယ်။” (မူရင်းအတိုင်း)
“နည်းလမ်းကတော့ ရေနွေးကြမ်းပူပူတစ်ခွက်ထဲကို ငရုပ်သီးအစိမ်းမှုန့်လက်ဖက်ရည်ဇွန်း တစ်ဇွန်းစာ ထည့်ရောမွှေပြီး လူနာကို တိုက်လိုက်တာ ဖြစ်ပါတယ်။ ဒီနည်းနဲ့လူနာဟာ တစ်မိနစ်အတွင်းမှာ ပုံမှန်ပြန်ဖြစ်တယ်လို့ ဆိုပါတယ်။” (မူရင်းအတိုင်း)
“ရေနွေးကြမ်းပူပူက ခန္ဓာကိုယ်ထဲက ဆဲလ်တွေကို ဖွင့်ပေးတဲ့အချိန်မှာ ငရုတ်သီးအစိမ်းမှုန့်ရဲ့စွမ်းအားက တွန်းပို့တဲ့အတွက် နှလုံးကို တိုက်ရိုက်ထိရောက်ခြင်း ဖြစ်ပါတယ်။ အဆိုပါနည်းလမ်းဟာ သောက်ဆေးတွေထက်တောင် တုံ့ပြန်မှုက ပိုမိုမြန်ဆန်ပါတယ်” (မူရင်းအတိုင်း)
တူညီတဲ့ပြောဆိုမှုတွေကို Facebook ရဲ့ ဒီလင့်ခ်၊ ဒီလင့်ခ် နဲ့ ဒီလင့်ခ်တွေအပြင် ဒီဘလော့ဂ်ပို့စ်မှာလည်း တင်ခဲ့တာ တွေ့ရပါတယ်။
ဒါပေမဲ့ ဒီပြောဆိုမှုဟာ မှားယွင်းတယ်လို့ ကျန်းမာရေးပညာရှင်တွေက ပြောဆိုကြပါတယ်။
သိပ္ပံနည်းကျအထောက်အထားမရှိ
ဗြိတိန်နိုင်ငံနှလုံးဖောင်ဒေးရှင်း (British Heart Foundation) ရဲ့ အကြီးတန်းနှလုံးသူနာပြု Ruth Goss ကလည်း Facebook မှာ ရေးထားတဲ့ကုထုံးဟာ မှားယွင်းတယ်လို့ ပြောပါတယ်။
“နှလုံးဖောက်ခြင်းဟာ နှလုံးကြွက်သားဆီကို သွေးထောက်ပံ့မှု ပြတ်တောက်သွားတဲ့အခါ ဖြစ်ပေါ်တဲ့ ကျန်းမာရေးဆိုင်ရာအရေးပေါ်အခြေအနေဖြစ်ပြီး သွေးခဲတွေက သွေးစီးဆင်းမှုကို ပိတ်ဆို့တာကြောင့် အဖြစ်များပါတယ်” လို့ Goss က AFP ကို ပြောပါတယ်။
“အဲဒီလိုအခြေအနေမှာ သွေးတွေပြန်လည် လည်ပတ်နိုင်ဖို့အတွက် သွေးပိတ်ဆို့မှုကို တတ်နိုင်သမျှ အမြန်ဖယ်ရှားရှင်းလင်းနိုင်ဖို့ အလွန်အရေးကြီးပါတယ်။ ရေနွေးမှာ ငရုတ်မှုန့်ထည့်သောက်တာကတော့ သွေးပိတ်ဆို့မှုကို ရှင်းလင်းပေးနိုင်မှာမဟုတ်ပါဘူး” လို့ သူက ဆိုပါတယ်။
အမေရိကန်နှလုံးအဖွဲ့အစည်း (American Heart Association) ရဲ့ နိုင်ငံဆိုင်ရာဆက်ဆံရေးဌာန အကြီးတန်းမန်နေဂျာ Cathy Lewis က ဒီအဆိုနဲ့ပတ်သက်လို့ သိပ္ပံနည်းကျအထောက်အထားမတွေ့ရဘူးလို့ ပြောပါတယ်။
“နှလုံးဖောက်တဲ့ လက္ခဏာတွေခံစားရသူတိုင်းဟာ အရေးပေါ် ဆေးကုသမှုအကူအညီ ချက်ချင်းရယူသင့်ပါတယ်” လို့ Lewis က AFP ကို ပြောပါတယ်။
ဂျီနီဗာမှာအခြေစိုက်တဲ့ ကမ္ဘာ့နှလုံးကျန်းမာရေးဖက်ဒရေးရှင်း (World Heart Federation) ရဲ့ ပြောရေးဆိုခွင့်ရှိသူတစ်ဦးက “ငရုတ်မှုန့်ကို ရေနွေးထဲထည့်သောက်တာက နှလုံးဖောက်တဲ့အခြေအနေရင်ဆိုင်နေရသူတွေအတွက် အကျိုးသက်ရောက်မှုရှိတယ်ဆိုတဲ့ အထောက်အထားမရှိပါဘူး” လို့ မကြာသေးခင်က AFP ကို ပြောပါတယ်။
“ထပ်လောင်းပြီးပြောချင်တာကတော့ အဲဒီလိုလုပ်ခြင်းအားဖြင့် အရေးပေါ် ကျန်းမာရေးအကူအညီလိုအပ်နေတဲ့ လူနာရဲ့အချိန်တွေကို ကြန့်ကြာစေတဲ့အတွက် အဲဒီပို့စ်ဟာ လူနာတွေအတွက် အန္တရာယ်များတယ်” လို့ သူက ဆိုပါတယ်။
AFP က ချည်းကပ်မေးမြန်းခဲ့တဲ့ ကျွမ်းကျင်သူတွေအားလုံးက တစ်စုံတစ်ယောက်ဟာ နှလုံးဖောက်တဲ့ဝေဒနာခံစားရပြီဆိုတာနဲ့ အရေးပေါ်ဌာနတွေကို ခေါ်ဆိုအကူညီတောင်းဖို့ကသာ “အဓိကဦးစားပေး” ဖြစ်တယ်လို့ ပြောဆိုကြပါတယ်။
ခပ်ပြင်းပြင်း ချောင်းဆိုးပေးလိုက်ရုံနဲ့ ရုတ်တရက်နှလုံးအမောဖောက်တာကို ကာကွယ်နိုင်တယ်လို့ မှားယွင်းဖော်ပြထားတဲ့ပို့စ်တွေနဲ့ နှလုံးရောဂါအတွက် အိမ်တွင်းကုထုံးတွေလို့ ပြောဆိုထားတဲ့ပို့စ်တော်တော်များများကိုလည်း AFP က အချက်အလက်စိစစ်ခဲ့ပြီး ဒီလင်ခ့်နဲ့ ဒီလင့်ခ်တွေမှာ ဖတ်ရှုနိုင်ပါတယ်။
AFP အား အချက်အလက်စိစစ်စေလိုသည့်အကြောင်းအရာ သင့်ထံမှာ ရှိပါသလား။
ကျွန်ုပ်တို့ကို ဆက်သွယ်ရန်