မက်ဆီကိုဂုဏ်ပြုတဲ့အနေနဲ့ ငွေစက္ကူထုတ်ဝေတယ်ဆိုတဲ့ အချက်အလက်မှားဓာတ်ပုံတွေ ကမ္ဘာတဝန်းပျံ့နှံ့

AFP © မူပိုင်ခွင့် ၂၀၁၇-၂၀၂၅။ ဤစာမူကို စီးပွားဖြစ် အသုံးပြုမည်ဆိုပါက လစဉ်/နှစ်စဉ်ကြေး ပေးသွင်းရန် လိုအပ်ပါသည်။ ပိုမိုသိရှိရန် ဤနေရာကို နှိပ်ပါ။

၂၀၂၂ ကာတာကမ္ဘာ့ဖလားပြိုင်ပွဲမှာ ဗိုလ်စွဲပြီးတဲ့နောက် အာဂျင်တီးနားနိုင်ငံဟာ လိုင်ယွန်နယ်မက်ဆီကို ဂုဏ်ပြုတဲ့အနေနဲ့ မက်ဆီပုံပါ ငွေစက္ကူတွေ ထုတ်ဝေလိုက်တယ်ဆိုတဲ့ အချက်အလက်မှားတွေ ကမ္ဘာတဝန်း ပျံ့နှံ့လာခဲ့ပါတယ်။ အာဂျင်တီးနားဗဟိုဘဏ်ကတော့ ဒီအချက်ကို ငြင်းဆိုလိုက်ပြီး မက်ဆီပုံပါ ငွေစက္ကူတွေ ထုတ်ဝေဖို့ အစီအစဉ်မရှိပါဘူးလို့ AFP ကို ပြောပါတယ်။ အချက်အလက်မှားပို့စ်တွေမှာပါဝင်တဲ့ ငွေစက္ကူပုံရိပ်တွေဟာ အာဂျင်တီးနားဗဟိုဘဏ်ရဲ့ ဝဘ်ဆိုဒ်မှာ ထုတ်ဝေဖို့တရားဝင်အဆိုပြုထားတဲ့ ငွေစက္ကူပုံစံတွေနဲ့ တူညီမှုမရှိပါဘူး။

“ကမ္ဘာ့ချန်ပီယံ အာဂျင်တီးနားအသင်းကို ငွေစက္ကူထုတ်ပြီး ဂုဏ်ပြု
မက်ဆီပုံပါတဲ့ ပီဆို ၁၀၀၀ တန်အပြင် ၂၀၂၂ ကမ္ဘာ့ချန်ပီယံအသင်းသားတွေနဲ့ ငွေစက္ကူကို အာဂျင်တီးနား အစိုးရက တရား၀င်ထုတ်ပြီး ဂုဏ်ပြုလိုက်ပါတယ်။” ဆိုပြီး မြန်မာ Facebook အသုံးပြုသူတစ်ဦးက ဒီဇင်ဘာ ၂၁ ရက်နေ့တုန်းက ဒီလင့်ခ်မှာ တင်ထားပါတယ်။


နားလည်မှုလွဲစေတဲ့ပို့စ်ကို ၂၀၂၂ ခုနှစ်၊ ဒီဇင်ဘာလ ၂၉ ရက်က ရယူထားတဲ့ screenshot

မှားယွင်းစွာပြောဆိုထားတဲ့ပို့စ်မှာ အာဂျင်တီးနားသုံးငွေ ပီဆို ၁၀၀၀ တန်ဆိုပြီး မက်ဆီပုံနဲ့ အာဂျင်တီးနားနိုင်ငံဘောလုံးအသင်းသားတွေပုံ ပါဝင်တာ တွေ့ရပါတယ်။

ဒါပေမဲ့ နိုင်ငံအသင်းပုံဟာ ဇွန်လတုန်းက Finalissima (ဥရောပ-တောင်အမေရိကဖလား) ဗိုလ်လုပွဲမှာ ဥရောပချန်ပီယံ အီတလီအသင်းကို အာဂျင်တီးနားအသင်းအနိုင်ရတုန်းက အောင်ပွဲခံနေတဲ့ပုံရိပ်ဖြစ်ပြီး ကာတာကမ္ဘာ့ဖလားပြိုင်ပွဲတုန်းက ပုံရိပ်မဟုတ်ပါဘူး။

မက်ဆီဟာ ကာတာနိုင်ငံ၊ ဒိုဟာမြို့မှာကျင်းပတဲ့ ကမ္ဘာ့ဖလားဗိုလ်လုပွဲမှာ ပြိုင်ဘက် ပြင်သစ်အသင်းဘက်ကို နှစ်ဂိုးအထိ သွင်းယူခဲ့သူဖြစ်ပါတယ်။

ကမ္ဘာ့ဖလားပြီးတာနဲ့ တပြိုင်နက်တည်းမှာပဲ အာဂျင်တီးနားက မက်ဆီပုံပါတဲ့ ငွေစက္ကူ ထုတ်ဝေမယ်ဆိုတဲ့ မှားယွင်းပြောဆိုမှုတွေ ကမ္ဘာတဝန်း ပျံ့နှံ့လာခဲ့တာဖြစ်ပါတယ်။

အလားတူပြောဆိုထားတဲ့ပို့စ်တွေကို တောင်ကိုရီးယား၊ အိန္ဒိယ၊ ဘင်္ဂလားဒေ့ရှ်၊ ဖိလစ်ပိုင်၊ နီပေါလ်၊ အမေရိကန်၊ နိုင်ဂျီးရီးယားနဲ့ ဆီယာရာလီယွန်းနိုင်ငံက အင်တာနက်သုံးစွဲသူတွေကြားမှာလည်း ပြန်လည်မျှဝေလျက်ရှိပါတယ်။

အာရပ်ဘာသာစကားနဲ့လည်း အလားတူပြောဆိုမှုတွေပျံ့နှံ့ခဲ့ပြီး AFP က အချက်အလက်စိစစ်ခဲ့ပါသေးတယ်။

အဲဒါအပြင် အလားတူနားလည်မှုလွဲစေတဲ့ပို့စ်တွေဟာ Facebook ပေါ်မှာ မြန်မာဘာသာစကားနဲ့လည်း ပျံ့နှံ့လျက်ရှိပါတယ်။

ဒါပေမဲ့ ဒီအဆိုဟာ မှားယွင်းပါတယ်။

ဒီဇင်ဘာ ၂၂ ရက်နေ့မှာ အာဂျင်တီးနားဗဟိုဘဏ် BCRA ကို AFP က ဆက်သွယ်မေးမြန်းတဲ့အခါ ဗဟိုဘဏ်အနေနဲ့ မက်ဆီပုံပါတဲ့ ငွေစက္ကူတွေထုတ်ဖို့ အစီအစဉ်မရှိထားပါဘူးလို့ ဘဏ်ရဲ့ စီနီယာဆက်သွယ်ရေးမန်နေဂျာ ဖာနန်ဒိုအလွန်ဆိုက ပြန်လည် ဖြေကြားခဲ့ပါတယ်။

တရားဝင်အဆိုတင်သွင်းမှုမရှိ

ငွေစက္ကူပုံလို့ဆိုထားတဲ့ ပျံ့နှံ့နေတဲ့ပုံရိပ်ဟာ BCRA ဝဘ်ဆိုဒ်မှာ ဖော်ပြထားသလိုမျိုး တရားဝင်အဆိုပြုထားတဲ့ပုံရိပ်တွေနဲ့လည်း ကိုက်ညီမှုမရှိတာကို တွေ့ရပါတယ်။

လက်ရှိ အာဂျင်တီးနားမှာအသုံးပြုနေတဲ့ ၁၀၀၀ တန်မှာ ပါဝင်တဲ့ရုပ်ပုံကတော့ အာဂျင်တီးနားရဲ့နိုင်ငံတော်အထိမ်းအမှတ်ငှက်ဖြစ်တဲ့ Rufous Hornero ဖြစ်ပြီး ဒီလင့်ခ်မှာ ကြည့်ရှုနိုင်ပါတယ်။

ပြီးခဲ့တဲ့မေလတုန်းကတော့ အာဂျင်တီးနားနိုင်ငံဟာ နိုင်ငံရဲ့ သမိုင်းဝင် သူရဲကောင်းတွေပါဝင်တဲ့ ငွေစက္ကူအသစ်တွေကို ထုတ်ပြန်ကြေညာခဲ့ပါတယ်။ ဒီငွေစက္ကူသစ်တွေထဲမှာ စပိန်-အမေရိကန် လွတ်လပ်ရေးစစ်ပွဲတွေမှာ အဓိကကျတဲ့ပုဂ္ဂိုလ်တစ်ဦးဖြစ်တဲ့ ဟိုဆေးဒီဆန်းမာတင်ပုံပါဝင်တဲ့ ပီဆို ၁၀၀၀ တန်လည်း ပါဝင်ပါတယ်။

အောက်မှာ အာဂျင်တီးနားဗဟိုဘဏ်က တရားဝင်အဆိုပြုထားတဲ့ ငွေစက္ကူတွေရဲ့ screenshot ဖြစ်ပါတယ်။

အာဂျင်တီးနားဗဟိုဘဏ်က တရားဝင်အဆိုပြုထားတဲ့ ငွေစက္ကူတွေရဲ့ screenshot ( AFP)

 

 

အာဂျင်တီးနားဗဟိုဘဏ်ဟာ ၂၀၂၂ ကာတာကမ္ဘာ့ဖလားဒင်္ဂါးပြားအပါအဝင် အမှတ်တရသိမ်းဆည်းဖို့ရည်ရွယ်ချက်နဲ့ ငွေစက္ကူအချို့ကို အရေအတွက်အကန့်အသတ်နဲ့ ထုတ်ဝေလျက်ရှိပါတယ်။

ဒီငွေစက္ကူ/ဒင်္ဂါးပြားတွေမှာလည်း မက်ဆီရဲ့ပုံရိပ် ပါဝင်ခြင်းမရှိပါဘူး။

AFP အား အချက်အလက်စိစစ်စေလိုသည့်အကြောင်းအရာ သင့်ထံမှာ ရှိပါသလား။

ကျွန်ုပ်တို့ကို ဆက်သွယ်ရန်

နောက်ဆောင်းပါး ယခင်ဆောင်းပါး