‘ဒူလာရောဂါ ပျောက်ကင်းစေတယ်’ ဆိုတဲ့မှားယွင်းပြောဆိုမှုနဲ့အတူ တရားမဝင်နို့မှုန့်တစ်မျိုးကို ကြော်ငြာထားတဲ့ပို့စ် ပျံ့နှံ့

ဒီနားလည်မှုလွဲစေတဲ့ပို့စ်ကို ၂၀၂၂ ခုနှစ်၊ အောက်တိုဘာလ ၃၁ ရက်နေ့က Facebook ဒီလင့်ခ်မှာ မျှဝေထားပြီး ကြည့်ရှုမှုအကြိမ်ရေ ၃၂,၀၀၀ ကျော်ရှိနေပါတယ်။

“ထောင်နှင့်ချီသော ဒူလာရောဂါသည်များ ဒီဘူးကို မသုံးရသောကြောင့် သိပ်မကြာခင် နောင်တရကြလိမ့်မည်” (မူရင်းအတိုင်း) ဆိုပြီး ဒီပို့စ်မှာ ဆိုထားပါတယ်။
“အမေရိကန်၊ ကနေဒါ၊ ယူကေ နဲ့ ပြင်သစ်နိုင်ငံတွေမှာ ဒူလာရောဂါသည်တွေအတွက် အရောင်းအားအကောင်းဆုံး နံပါတ်တစ် ကုန်ပစ္စည်းနှင့် မိတ်ဆက်ပေးပါရစေ။
ဒူလာရောဂါ ခံစားနေရတာ 10 နှစ် ဖြစ်ဖြစ် နှစ် 20 ဖြစ်ဖြစ် သူက သက်သာပျောက်ကင်းအောင် ကုသပေးနိုင်တယ်။” (မူရင်းအတိုင်း)

“Golden Gout နို့ရည်ကြည်ဖြင့် ဒူလာရောဂါကို ကာကွယ်လိုက်ပါ
ဒူလာရောဂါ ပြဿနာများအတွက် နံပါတ်တစ် အကောင်းဆုံး
ခန္ဓာကိုယ်အတွင်းမှ ယူရစ်အက်ဆစ် ပါဝင်နှုန်း လျှော့ချပေးသည်
ဒူလာရောဂါကို စိုးရိမ်ပူပန်စရာ တစ်ခု အဖြစ်မခံပါနှင့်
တစ်ရက်လျှင် 2 ခွက် သောက်သုံးရုံဖြင့်
ဒူလာရောဂါကြောင့် ဖြစ်သော နာကျင်ကိုက်ခဲမှုများကို သက်သာစေပြီး နောက်ဆက်တွဲဆိုးကျိုးများကို ကာကွယ်ပေးသည်
ခန္ဓာကိုယ်အတွင်းမှ ယူရစ်အက်ဆစ်များကို လျှော့ချပေးသည်
ယူရစ်အက်ဆစ် ပါဝင်မနှုန်းကို လုံခြုံစိတ်ချရသော ပမာဏတွင် ကြာရှည်စွာ တည်ငြိမ်နေစေရန် ကူညီပေးသည်
Urate salts ကို ဖယ်ရှားပေးပြီး တိုဖိ (tophi) ကို ပျော့ပြောင်းစေသည်
အသည်းနှင့် ကျောက်ကပ်ကို ကျန်းမာစေသည်၊ အရိုးအဆစ် သန်မာစေသည်။” (မူရင်းအတိုင်း)

ဒီနို့မှုန့်ကို သောက်သုံးလို့ ဒူလာရောဂါပျောက်ကင်းသွားကြတယ်ဆိုပြီး သုံးစွဲသူတွေရဲ့ထွက်ဆိုချက်ဗီဒီယိုကို ဒီပြောဆိုမှုနဲ့အတူတွေ့နိုင်ပါတယ်။

Gout ခေါ် ဒူလာရောဂါဟာ အရိုးအဆစ်ရောင်ရမ်းခြင်းနဲ့ နာကျင်မှုတွေဖြစ်ပွားစေတဲ့ နာတာရှည်ရောဂါတစ်မျိုးဖြစ်ပါတယ်။ ဒီရောဂါဟာ လေးဘက်နာရောဂါတစ်မျိုးဖြစ်ပြီး ခန္ဓာကိုယ်တွင်း Uric acid အစမတန်များပြားခြင်းကြောင့်ဖြစ်တဲ့ ရောဂါဖြစ်ပါတယ်။

Image

၂၀၂၂ ခုနှစ်၊ ဒီဇင်ဘာလ ၁၉ ရက်နေ့က ရယူထားတဲ့ နားလည်မှုလွဲစေတဲ့ပို့စ်ရဲ့ Screenshot

ဒီ “Golden Gout” နို့မှုန့်ကို ကြော်ငြာထားတဲ့ အခြားဗီဒီယိုတွေကိုလည် Facebook ဒီလင့်ခ်၊ ဒီလင့်ခ် နဲ့ ဒီလင့်ခ်တွေမှာ မျှဝေထားပြီး ကြည့်ရှုမှုအကြိမ်ရေ သိန်းနဲ့ချီရှိနေပါတယ်။

ဒီပို့စ်က Facebook အသုံးပြုသူတွေကို နားလည်မှုလွဲစေတာကို မှတ်ချက်တွေမှာ ကြည့်ရင် သိနိုင်ပါတယ်။

“ဆေးချိုသွေးချိုရှိတဲ့သူ သောက်လို့ရမလား” (မူရင်အတိုင်း) ဆိုပြီး Facebook အသုံးပြုသူတစ်ဦးက မေးမြန်းထားပြီး “ဂေါက်လေးဘက်နာရှိသူthyroidရောဂါရှိသူသောက်လို့ရမလား” (မူရင်းအတိုင်း) ဆိုတဲ့ မှတ်ချက်တွေလည်း တွေ့ရပါတယ်။

ဒါပေမဲ့ ဒူလာရောဂါကို ပျောက်ကင်းစေတဲ့ ကုသမှုမရှိတဲ့အပြင် “Golden Gout” နို့မှုန့်ကို သောက်သုံးခြင်းမပြုဖို့ ဖိလစ်ပိုင်နိုင်ငံ အစားအသောက်နဲ့ဆေးဝါးကွပ်ကဲရေးဦးစီးဌာနက တိုက်တွန်းထားပါတယ်။

‘မှတ်ပုံမတင်ထားတဲ့ နို့မှုန့်’

“အစားအသောက်နှင့် ဆေးဝါးကွပ်ကဲရေးဦးစီးဌာန (FDA) မှ ကျန်းမာရေး စောင့်ရှောက်မှု ကျွမ်းကျင်သူများနှင့် အများပြည်သူများအား အောက်ဖော်ပြပါ တရားမဝင် ဖြည့်စွက်စာ နှင့် အစားအသောက် ထုတ်ကုန်များကို ဝယ်ယူခြင်းနှင့် သုံးစွဲခြင်း မပြုရန် သတိပေးချက်…GOLDEN GOUT PLUS Colostrum Low Sugar Milk.” ဆိုထားတဲ့ သတိပေးချက်ကို ဖိလစ်ပိုင် FDA က ဒီဇင်ဘာလ ၆ ရက်နေ့က ဒီလင့်ခ်မှာ ထုတ်ပြန်ထားပါတယ်။

ဒီနို့မှုန့်ဟာ “FDA ရဲ့ အကဲဖြတ်မှုလုပ်ငန်းစဥ်အရစိစစ်မှုမလုပ်ရသေးတဲ့ ထုတ်ကုန်”တွေဖြစ်တယ်လို့ ဒီထုတ်ပြန်စာမှာ ဖော်ပြထားပါတယ်။

“FDA အနေနဲ့ ဒီထုပ်ကုန်ရဲ့ အရည်အသွေးနဲ့ လုံခြုံရေးအတွက် အာမမခံနိုင်ဘူး” ဖြည့်စွက်ဖော်ပြထားပါတယ်။

ဒါ့အပြင် ဒီဇင်ဘာလ ၁၆ ရက်နေ့အထိ ဖိလစ်ပိုင် FDA ရဲ့ တရားဝင်အသိအမှတ်ပြုထားတဲ့ စားသောက်ကုန်စာရင်းမှာ “Golden Gout” နို့မှုန့်မပါဝင်တာကို တွေ့ရပါတယ်။

‘ဒူလာရောဂါ ပျောက်ကင်းစေတဲ့ဆေး မရှိ’

အမေရိကန် ရောဂါထိန်းချုပ်ရေးနှင့် ကာကွယ်ရေးစင်တာ (CDC) က “ဒူလာရောဂါကို ပျောက်ကင်းစေတဲ့ ကုထုံးမရှိဘူး” လို့ ဒီရောဂါနဲ့ပက်သက်တဲ့ အချက်အလက်တွေကို ဖော်ပြထားတဲ့ ဒီလင့်ခ်မှာ ဆိုထားပါတယ်။

ဒါပေမဲ့ ဒူလာရောဂါ ရောဂါလက္ခဏာတွေကို ဆေးဝါးတွေနဲ့ ထိရောက်စာသက်သာစေနိုင်တယ်လို့ CDC ကပြောဆိုထားပါတယ်။ ဒီရောဂါရဲ့ တိုက်ခိုက်မှုတွေကို ကျန်းမာတဲ့အစားအသောက်တွေစားသုံးခြင်းနဲ့ ကိုယ်လက်လေ့ကျင့်ခန်းလုပ်ဆောင်မှုတွေနဲ့ ကာကွယ်နိုင်တယ်လို့ ဖြည့်စွက်ပြောဆိုထားပါတယ်။

မနီလာအခြေစိုက် ဒူလာအထူးကုပါရဂူတစ်ဦးဖြစ်တဲ့ Dr Geraldine Zamora က ဒူလာရောဂါကူသမှုဟာ “တစ်သက်တာလုံး” ကြာမြင့်နိုင်တယ်လို့ ပြောပါတယ်။

“ဒီနာတာရှည် ရောဂါလက္ခဏာတွေကို ထိန်းချုပ်ဖို့ လွယ်ကူလျင်မြန်တဲ့ ကုသမှုတွေမရှိပါဘူး” လို့ သူမက နိုဝင်ဘာလ ၃ ရက်နေ့က AFP ကိုပြောပါတယ်။

“ဒူလာရောဂါနဲ့ လေးဘက်နာရောဂါလို နာတာရှည် ရောဂါကုသမှုဟာ တစ်သက်သာလုံးအတွက်ဖြစ်ပါတယ်။”

တရားမဝင်ဖြည့်စွက်စာတွေကို ကြော်ငြာရောင်းချတဲ့ အခြားနားလည်မှုလွဲစေတဲ့ပို့စ်တွေကို AFP က ဒီလင့်ခ်နဲ့ ဒီလင့်ခ်တွေမှာ အချက်အလက်စိစစ်ထားပါတယ်။