ရေနွေးပုံမှန်သောက်သုံးရင် ရောဂါမျိုးစုံကို ကုသပျောက်ကင်းစေနိုင်တယ်ဆိုတဲ့ မှားယွင်းပြောဆိုချက်ကို ကျန်းမာရေးကျွမ်းကျင်သူတွေ ငြင်းဆို
- ဤဆောင်းပါးသည် သက်တမ်းတစ်နှစ်ကျော် ရှိနေပြီဖြစ်သည်။
- ပုံနှိပ်ဖော်ပြသည့်နေ့စွဲ 17 ဇန်နဝါရီ 2023 အချိန် 06h48
- ဖတ်ရန် ကြာချိန် 1 မိနစ်
- AFP ထိုင်း
AFP © မူပိုင်ခွင့် ၂၀၁၇-၂၀၂၅။ ဤစာမူကို စီးပွားဖြစ် အသုံးပြုမည်ဆိုပါက လစဉ်/နှစ်စဉ်ကြေး ပေးသွင်းရန် လိုအပ်ပါသည်။ ပိုမိုသိရှိရန် ဤနေရာကို နှိပ်ပါ။
“ရေနွေးနဲ့ကုသပုံကို လူကြီးမင်း ယုံမှာတောင်မဟုတ်ဘူး။ ဂျပန်မှာ များပြားလှတဲ့ သမားတော်ကြီးတွေဟာ ရေနွေးနဲ့ ကုသခြင်းကြောင့် ၁၀၀% ရလဒ်ကောင်းတွေ ရတယ်လို့ တညီတညွတ်တည်း ဆိုကြပါတယ်။” (မူရင်းအတိုင်း) ဆိုပြီး ၂၀၂၂ ခုနှစ်၊ ဒီဇင်ဘာလ ၂၃ ရက်နေ့က မျှဝေထားတဲ့ Facebook ပို့စ်မှာ ဆိုထားပါတယ်။
ဒီပို့စ်ကို ပြန်လည်မျှဝေမှုအကြိမ်ရေ ၆၈ ကြိမ်ရှိနေပါတယ်။
ရေနွေး သောက်သုံးခြင်းက သွေးတိုးရောဂါ၊ နှလုံးရောဂါနဲ့ ဝက်ရူးပြန်ရောဂါအပါအဝင် အခြားရောဂါအများအပြားကို ပျောက်ကင်းစေနိုင်တယ်လို့ ဒီပို့စ်မှာ ဆိုထားပါတယ်။
ဒီအလေ့အကျင့်ကို “ဂျပန်ရေကုထုံး” လို့ပြောဆိုထားပြီး အိပ်ရာနိုးနိုးချင်း အစာမစားခင် ရေနွေးလေးခွက်သောက်သုံးခြင်းကို ဆိုလိုတာဖြစ်ပါတယ်။
ဒီပို့စ်မှာ ရောဂါတစ်ခုခြင်းစီကို ဒီနည်းလမ်းနဲ့ ပျောက်ကင်းစေဖို့ကြာချိန်တွေကိုပါ ဖော်ပြထားပါတယ်။ ဥပမာအားဖြစ် နှလုံးရောဂါနဲ့ ဆီးချိုရောဂါကို ဒီနည်းလမ်းနဲ့ ရက် ၃၀ အတွင်းပျောက်ကင်းစေနိုင်တယ်လို့ ဆိုထားပါတယ်။
“ရေအေးဟာ နှလုံးရဲ့သွေးကြော (၄) ခုကို ပူးသွားစေတယ် ... နှလုံးရဲ့သွေးကြောမကြီးကိုလည်း ပိတ်သွားစေတယ် ... နှလုံးရောဂါဖြစ်ဖို့ အကြောင်းခံဖြစ်တတ်တယ်” (မူရင်းအတိုင်း) ဆိုပြီး ဒီပို့စ်မှာ ပြောဆိုထားပါတယ်။
တူညီတဲ့ပြောဆိုမှုနဲ့ ဒီအဆိုကို Facebook ဒီလင့်ခ်၊ ဒီလင့်ခ်နဲ့ ဒီလင့်ခ်တွေမှာမျှဝေထားပါတယ်။
ဒါပေမဲ့ ဒီအဆိုဟာ မှားယွင်းပါတယ်။
သိပ္ပံနည်းကျ အထောက်အထားမရှိ
ရေနွေးသောက်ခြင်းက ရောဂါဝေဒနာတွေကို သက်သာပျောက်ကင်းစေတယ်ဆိုတဲ့ သိပ္ပံနည်းကျအထောက်အထားတွေ မရှိဘူးလို့ ဘန်ကောက်အခြေစိုက် Phyathai ဆေးရုံရဲ့ အတွင်းပိုင်းဆေးဝါးအထူးကုပညာရှင်တစ်ဦးဖြစ်သူ Navaporn Napartivaumnuay က AFP ကိုပြောပါတယ်။
“ဒီပို့စ်မှာ ဖော်ပြထားတဲ့ အဆီကျစေခြင်းနဲ့ နှလုံရောဂါအပါအဝင် ရောဂါတွေကို ရေနွေးသောက်ခြင်းနဲ့ ကုသဖို့မဖြစ်နိုင်ပါဘူး” လို့ သူမက ၂၀၂၂ ခုနှစ်၊ ဒီဇင်ဘာလ ၃၀ ရက်နေ့မှာ ဖုန်းအင်တာဗျူးကနေတဆင့် AFP ကိုပြောပါတယ်။
အပူချိန် ၅၀ မှ ၇၀ ဒီဂရီအကြားရှိတဲ့ ရေနွေးကို သောက်သုံးခြင်းက အေးချမ်းတဲ့ရာသီမှာ နွေးထွေးမှုပေးနိုင်ပြီး လည်ချောင်းနာကျင်ခြင်းကို သက်သာစေနိုင်ပေမယ့် “ဘတ်တီးရီးယားတွေနဲ့ ဗိုင်းရပ်စ်တွေကို နှိမ်နင်းနိုင်ခြင်းမရှိပါဘူး” လို့ သူမက ဖြည့်စွက်ပြောခဲ့ပါတယ်။
ရေအေးသောက်သုံးခြင်းက နှလုံးသွေးကြောတွေကို ပိတ်ဆို့ခြင်းနဲ့ နှလုံးရောဂါဖြစ်နိုင်စေခြင်းမရှိဘူးလို့လည်းသူမက ပြောပါတယ်။
“ဒါဟာ သွေးကြောထဲမှာ calcified plaque ဒါမှမဟုတ် အဆီစုပုံခြင်းတွေကြောင့်ဖြစ်တယ်လို့” သူမက ပြောပါတယ်။
အမေရိကန်နိုင်ငံက တရားဝင်အသိအမှတ်ပြု အစားအသောက်ဆိုင်ရာကျွမ်းကျင်သူဖြစ်တဲ့ SaVanna Shoemaker က ဒီ “ကုထုံး” ဟာ ခန္ဓာကိုယ်တွင်းရေဓာတ်တိုးမြှင့်ခြင်းနဲ့ ကယ်လိုရီကျဆင်းစေနိုင်ခြင်း စတဲ့အကျိုးပြုမှုတွေရှိပေမယ့်“ကျန်းမာရေးဆိုင်ရာရောဂါတွေကို ပျောက်ကင်းကုသစေနိုင်ခြင်းမရှိဘူး”လို့ ပြောပါတယ်။
“ကျွန်မအနေနဲ့ ဒီ ဂျပန်ရေကုထုံးနဲ့ သက်ဆိုင်တဲ့ သုသေသနစာတမ်းတွေနဲ့ လေ့လာချက်တွေ မတွေ့ရဘူး”လို့ ၂၀၂၂ ခုနှစ်၊ ဒီဇင်ဘာလ ၁၁ ရက်နေ့မှာ အီးမေးလ်ကတဆင့် AFP ကိုပြောပါတယ်။.
ရေနွေးသောက်သုံးခြင်းက ကင်ဆာရောဂါကိုကာကွယ်စေနိုင်တယ်လို့ဆိုထားတဲ့ မှားယွင်းပြောဆိုချက်ကို AFP က ဒီလင့်ခ်မှာ အချက်အလက်စိစစ်ထားပြီး ရေအေးသောက်သုံးခြင်းက အန္တရာယ်ဖြစ်စေနိုင်တယ်ဆိုတဲ့ မှားယွင်းပြောဆိုချက်ကိုလည်း ဒီလင့်ခ်မှာ အချက်အလက်စိစစ်ထားပါတယ်။
AFP အား အချက်အလက်စိစစ်စေလိုသည့်အကြောင်းအရာ သင့်ထံမှာ ရှိပါသလား။
ကျွန်ုပ်တို့ကို ဆက်သွယ်ရန်