တူရကီမှာ ၂၀၂၃ ခုနှစ်၊ ဖေဖော်ဝါရီလက ငလျင်လှုပ်ပြီးနောက် ရိုက်ကူးထားတဲ့ပုံဆိုတဲ့စာသားနဲ့ ဓာတ်ပုံဟောင်း ပျံ့နှံ့
- ဤဆောင်းပါးသည် သက်တမ်းတစ်နှစ်ကျော် ရှိနေပြီဖြစ်သည်။
- ပုံနှိပ်ဖော်ပြသည့်နေ့စွဲ 08 ဖေဖော်ဝါရီ 2023 အချိန် 08h55
- နောက်ဆုံးတည်းဖြတ်သည့်နေ့စွဲ 08 ဖေဖော်ဝါရီ 2023 အချိန် 08h57
- ဖတ်ရန် ကြာချိန် 1 မိနစ်
- AFP ထိုင်း
AFP © မူပိုင်ခွင့် ၂၀၁၇-၂၀၂၅။ ဤစာမူကို စီးပွားဖြစ် အသုံးပြုမည်ဆိုပါက လစဉ်/နှစ်စဉ်ကြေး ပေးသွင်းရန် လိုအပ်ပါသည်။ ပိုမိုသိရှိရန် ဤနေရာကို နှိပ်ပါ။
“ဒီပုံကို ဒီနေ့ တူရကီနိုင်ငံ ...
ရိုက်ထားတာပါ။
” ဆိုတဲ့စာသားနဲ့အတူ Facebook သုံးစွဲသူတစ်ဦးက သူ့ Facebook ရဲ့ ဒီလင့်ခ် မှာ ၂၀၂၃ ခုနှစ်၊ ဖေဖော်ဝါရီလ ၇ ရက်နေ့က တင်ထားပါတယ်။
တူရကီနိုင်ငံအရှေ့ပိုင်းနဲ့ ဆီးရီးယားနိုင်ငံမြောက်ပိုင်းဒေသတွေမှာ ဖေဖော်ဝါရီလ ၆ ရက်နေ့က ပြင်းအား ၇.၈ မဂ္ဂနီကျူ့ရှိတဲ့ ငလျင်တစ်ခုလှုပ်ခတ်လို့ လူ ထောင်ချီသေဆုံး၊ အဆောက်အအုံထောင်နဲ့ချီ ပြိုကျပြီးတဲ့နောက်မှာ အခုလိုဓာတ်ပုံတွေ အွန်လိုင်းပေါ် ပျံ့နှံ့လာခဲ့တာဖြစ်ပါတယ်။
ငလျင်ကြောင့် ဖေဖော်ဝါရီ ၇ ရက်နေ့အထိ သေဆုံးတဲ့သူအရေအတွက်ဟာ ၇,၉၀၀ အထိ ရှိပေမယ့် ကုလသမဂ္ဂကျန်းမာရေးအဖွဲ့ (WHO) ကတော့ သေဆုံးသူ အရေအတွက်ဟာ ၂၀,၀၀၀ ကျော်အထိ မြင့်တက်လာဖွယ်ရှိတယ်လို့ ခန့်မှန်းထားပါတယ်။
အလားတူပြောဆိုမှုတွေနဲ့ တူညီတဲ့ဓာတ်ပုံတွေကို မြန်မာအင်တာနက်သုံးစွဲသူတွေကြား ပြန်လည်မျှဝေနေကြတာကို ဒီလင့်ခ်၊ ဒီလင့်ခ် နဲ့ ဒီလင့်ခ်တွေမှာ တွေ့မြင်နိုင်ပါတယ်။
ဒီပုံနဲ့ အခြားဆင်တူတဲ့ပုံတွေကိုလည်း အလားတူပြောဆိုမှုတွေနဲ့ အိန္ဒိယ၊ ပါကစ္စတန်နဲ့ ဗြိတိန်နိုင်ငံက အင်တာနက်သုံးစွဲသူတွေကြား ပြန်လည်မျှဝေနေကြတာကို ဒီလင့်ခ်၊ ဒီလင့်ခ်၊ ဒီလင့်ခ်နဲ့ ဒီလင့်ခ်တွေမှာလည်း တွေ့နိုင်ပါတယ်။
ဒါပေမဲ့ ဒီပုံတွေအကုန်လုံးဟာ ဖေဖော်ဝါရီလ ၆ ရက် ငလျင်မလှုပ်ခင်ကတည်းက ဓာတ်ပုံရောင်းဝယ်ရေးဝဘ်ဆိုဒ်တွေနဲ့ တခြားသတင်းဝဘ်ဆိုဒ်တွေမှာ ရှိနေခဲ့ပြီးဖြစ်ပါတယ်။
Google မှာ ဓာတ်ပုံရာဇဝင်ရှာကြည့်တဲ့အခါ ဒီပုံကို ဓာတ်ပုံတွေရောင်းတဲ့ဆိုဒ်တစ်ခုဖြစ်တဲ့ Shutterstock မှာ တွေ့ရပြီး ဓာတ်ပုံရိုက်ကူးခဲ့သူဟာ ချက်နိုင်ငံသားဓာတ်ပုံဆရာ Jaroslav Noska လို့ သိရပါတယ်။
ပုံစာမှာတော့ အခုလို ရေးသားထားပါတယ်။ “ငလျင်လှုပ်ပြီးနောက် အပျက်အစီးများကြား ဒဏ်ရာရလူများကို လိုက်လံရှာဖွေနေသည့် ခွေးကလေး”
ဒီဓာတ်ပုံဟာ “ခွေးကလေးက ကယ်ဆယ်ခြင်း” ဆိုတဲ့နာမည်နဲ့ စုစည်းဖော်ပြ (collection) ထားတဲ့ ဓာတ်ပုံပေါင်းများစွာထဲက တစ်ပုံဖြစ်ပြီး ၂၀၁၉ ခုနှစ်၊ ဇန်နဝါရီလ ၃ ရက်က နောက်ဆုံး တည်းဖြတ်ဖြည့်စွက်ထားတယ်လို့ ဖော်ပြထားပါတယ်။
ဒီဓာတ်ပုံကိုပဲ အခြားသော ဓာတ်ပုံရောင်းချရေးဝဘ်ဆိုဒ်တွေဖြစ်တဲ့ Bigstock ဒီလင့်ခ်နဲ့ Alamy ဒီလင့်ခ်တို့မှာလည်း တင်ထားပြီး ၂၀၁၈ ခုနှစ်၊ အောက်တိုဘာလ ၁၈ ရက်နေ့က ရိုက်ကူးခဲ့တာဖြစ်တယ်လို့ ဖော်ပြထားပါတယ်။
အောက်မှာ နားလည်မှုလွဲစေတဲ့ပို့စ်တွေမှာတင်ထားတဲ့ဓာတ်ပုံ (ဘယ်) နဲ့ Alamy ဝဘ်ဆိုဒ်မှာ တင်ထားတဲ့ပုံ (ညာ) တို့ကို နှိုင်းယှဉ်ဖော်ပြထားတဲ့ screenshot ဖြစ်ပါတယ်။
၂၀၂၀ ပြည့်နှစ်၊ အောက်တိုဘာလ ၃၀ ရက်နေ့က တူရကီနိုင်ငံ၊ Izmir မြို့ကို ငလျင်လှုပ်လို့ လူ ၉၀ ကျော်သေဆုံးခဲ့တုန်းကလည်း အလားတူဓာတ်ပုံနဲ့ မှားယွင်းပြောဆိုထားတဲ့ပို့စ်တွေကို AFP က ဖော်ထုတ်ရေးသားခဲ့ဖူးပါတယ်။
AFP အား အချက်အလက်စိစစ်စေလိုသည့်အကြောင်းအရာ သင့်ထံမှာ ရှိပါသလား။
ကျွန်ုပ်တို့ကို ဆက်သွယ်ရန်