၂၀၂၃ ခုနှစ်မှာ PDF တွေပစ်ချတဲ့ စစ်ရဟတ်ယာဉ်ဆိုပြီး ဓာတ်ပုံဟောင်း မှားယွင်းပျံ့နှံ့
- ဤဆောင်းပါးသည် သက်တမ်းတစ်နှစ်ကျော် ရှိနေပြီဖြစ်သည်။
- ပုံနှိပ်ဖော်ပြသည့်နေ့စွဲ 10 ဖေဖော်ဝါရီ 2023 အချိန် 10h34
- ဖတ်ရန် ကြာချိန် 1 မိနစ်
- AFP ထိုင်း
AFP © မူပိုင်ခွင့် ၂၀၁၇-၂၀၂၅။ ဤစာမူကို စီးပွားဖြစ် အသုံးပြုမည်ဆိုပါက လစဉ်/နှစ်စဉ်ကြေး ပေးသွင်းရန် လိုအပ်ပါသည်။ ပိုမိုသိရှိရန် ဤနေရာကို နှိပ်ပါ။
“ဖေဖော်ဝါရီ ၃ ရက် နေ့လည် (၃:၄၅)နာရီခန့်တွင် ဟုမ္မလင်းမြို့နယ် ဖြစ်ပွားသော တိုက်ပွဲ၌ ပြည်သူ့ကာကွယ်ရေးတပ်မတော်မှ စကစ ရဟတ်ယာဉ် ၁ စီးကို ပျက်ကျအောင် ပစ်ချခဲ့သည့် လေပျံ အပိုင်းအစ ပုံရိပ်။ Feb 3” (မူရင်းအတိုင်း) ဆိုတဲ့ စာသားနဲ့ Facebook သုံးစွဲသူတစ်ဦးက ဒီလင့်ခ်မှာ ပြန်လည်မျှဝေထားပါတယ်။
ဓာတ်ပုံမှာ ပျက်ကျတဲ့ရဟတ်ယာဉ်တစ်စီးနား စုဝေးနေကြတဲ့လူတွေကို တွေ့ရပါတယ်။
၂၀၂၀ ပြည့် အထွေထွေရွေးကောက်ပွဲအတွင်း မဲမသမာလုပ်တယ်ဆိုတဲ့ စွပ်စွဲချက်နဲ့အတူ ဒီမိုကရေစီပြယုဂ်ဖြစ်တဲ့ ဒေါ်အောင်ဆန်းစုကြည်နဲ့ အရပ်သားအစိုးရကို စစ်တပ်က ဖြုတ်ချလိုက်ပြီးတဲ့နောက်ပိုင်း မြန်မာနိုင်ငံမှာ ပဋိပက္ခတွေ ပေါ်ပေါက်လာခဲ့ပါတယ်။
ဖေဖော်ဝါရီလ ၃ ရက်နေ့တုန်းက စစ်ကိုင်းတိုင်းဒေသကြီး၊ ဟုမ္မလင်းမြို့နယ်မှာ PDF တွေက စစ်ရဟတ်ယာဉ်တစ်စီးကို ပစ်ချနိုင်ခဲ့တယ်လို့ NUG က ထုတ်ပြန်ခဲ့ပါတယ်။
ဒီဖြစ်စဉ်နဲ့ပတ်သက်လို့ AFP အနေနဲ့ သီးခြားအတည်ပြုနိုင်ခြင်း မရှိသေးပါဘူး။
တူညီတဲ့ဓာတ်ပုံတွေကို အလားတူပြောဆိုမှုတွေနဲ့ Facebook ရဲ့ ဒီလင့်ခ်၊ ဒီလင့်ခ်နဲ့ ဒီလင့်ခ်တွေမှာ ပြန်လည်မျှဝေနေကြပါတယ်။
၂၀၂၂ ခုနှစ် ပျက်ကျမှု
အဓိကကျတဲ့စကားလုံးတွေသုံးပြီး Google မှာ ရှာကြည့်တဲ့အခါ မူရင်းဓာတ်ပုံကို တရုတ်အစိုးရသတင်းဌာနတစ်ခုဖြစ်တဲ့ Xinhua ရဲ့ မြန်မာဘာသာပိုင်းဝဘ်ဆိုဒ်မှာ ၂၀၂၂ ခုနှစ်၊ မတ်လ ၂၉ ရက်နေ့က သတင်းတစ်ပုဒ်နဲ့အတူ တင်ထားတာ တွေ့ရပါတယ်။
သတင်းခေါင်းစဉ်က အခုလိုဖြစ်ပါတယ်။ “ဟားခါးတွင် တပ်မတော်ရဟတ်ယာဉ်တစ်စီး တောင်စောင်းပေါ် ပျက်ကျရာ လူ ၅ဦး ဒဏ်ရာရရှိ”
သတင်းပါ စာသားအချို့က အခုလိုဖြစ်ပါတယ်။ “အဆိုပါ ရဟတ်ယာဉ်သည် တက္ကသိုလ်ဝင်စာမေးပွဲ မေးခွန်းများ သယ်ဆောင်လာခြင်းဖြစ်ကြောင်း ၊လမ်းပန်းဆက်သွယ်ရေးခက်ခဲသည့် နေရာဖြစ်၍ တပ်မတော်ရဟတ်ယာဉ်အသုံးပြုသယ်ဆောင်ရခြင်းဖြစ်ကြောင်း၊ ယနေ့ နံနက် ၈နာရီ ၅၀ခန့်တွင် ကလေးမြို့မှ ရဟတ်ယာဉ်ထွက်ခွာလာပြီး ဟားခါးရှိ ရဟတ်ယာဉ်ကွင်းသို့ ဦးတည်ပျံသန်းစဥ် တောင်ပေါ်ဖြစ်သည့်အတွက် ရဟတ်ယာဉ်သည် အောက်မှ လေပင့်အားကြောင့် ပြုတ်ကျခဲ့ခြင်းဖြစ်ကြောင်း နိုင်ငံတော်စီမံအုပ်ချုပ်ရေးကောင်စီ၏ သတင်းထုတ်ပြန်ရေးအဖွဲ့ထံမှ သိရသည်။” (မူရင်းအတိုင်း)
ဟားခါးဟာ ချင်းပြည်နယ်ရဲ့ မြို့တော်ဖြစ်ပါတယ်။
ဓာတ်ပုံအညွှန်းစာမှာတော့ အခုလိုပါရှိပါတယ်။ “ယနေ့ ဟားခါးမြို့တွင် ပျက်ကျခဲ့သည့် တပ်မတော်ရဟတ်ယာဉ်အားတွေ့ရစဉ်(MRTV)”
အောက်မှာ နားလည်မှုလွဲစေတဲ့ပို့စ်တွေက ဓာတ်ပုံ (ဘယ်) နဲ့ Xinhua မှာတင်ထားတဲ့ဓာတ်ပုံ (ညာ) တို့ကို နှိုင်းယှဉ်ပြထားတဲ့ screenshot ဖြစ်ပါတယ်။
ဒီဓာတ်ပုံကိုပဲ မြန်မာအစိုးရမီဒီယာဖြစ်တဲ့ MITV မှာလည်း သတင်းတစ်ပုဒ်နဲ့အတူ ၂၀၂၂ ခုနှစ်၊ မတ်လ ၂၉ ရက်နေ့က တင်ထားတာ တွေ့ရပါတယ်။
အင်္ဂလိပ်လိုရေးသားထားတဲ့ခေါင်းစဉ်က အခုလိုဖြစ်ပါတယ်။ “ရဟတ်ယာဉ် မတော်တဆမှု – ဟားခါးလေဆိပ်အနီး တပ်မတော်ရဟတ်ယာဉ်မတော်တဆမှုဖြစ်ပွားကြောင်းအတည်ပြု” (AFP ဘာသာပြန်)
Eleven၊ ဧရာ၀တီနဲ့ RFA တို့အပါအဝင် မီဒီယာအများအပြားမှာလည်း ဒီသတင်းကို ဖော်ပြခဲ့ကြပါတယ်။ အမေရိကန်အခြေစိုက် လေကြောင်းမတော်တဆမှု စောင့်ကြည့်ရေးဝဘ်ဆိုဒ်တစ်ခုဖြစ်တဲ့ Aviation Safety Network ကလည်း အဲဒီရဟတ်ယာဉ်မတော်တဆမှုကို ဒီလင့်ခ်မှာ မှတ်တမ်းတင်ထားပါတယ်။
AFP အား အချက်အလက်စိစစ်စေလိုသည့်အကြောင်းအရာ သင့်ထံမှာ ရှိပါသလား။
ကျွန်ုပ်တို့ကို ဆက်သွယ်ရန်