တူရကီ-ဆီးရီးယားငလျင် “ဆူနာမီ”ဆိုပြီး မှားယွင်းပြောဆိုမှုနဲ့ တောင်အာဖရိက ဗီဒီယိုဟောင်း ပျံ့နှံ့
- ဤဆောင်းပါးသည် သက်တမ်းတစ်နှစ်ကျော် ရှိနေပြီဖြစ်သည်။
- ပုံနှိပ်ဖော်ပြသည့်နေ့စွဲ 13 ဖေဖော်ဝါရီ 2023 အချိန် 08h16
- ဖတ်ရန် ကြာချိန် 2 မိနစ်
- Adria LABORDA, AFP စပိန်, AFP ဟောင်ကောင်, AFP ထိုင်း
- ဘာသာပြန်ခြင်းနှင့် ဆီလျော်အောင်ပြန်လည်ရေးသားခြင်း - Clara IP
AFP © မူပိုင်ခွင့် ၂၀၁၇-၂၀၂၅။ ဤစာမူကို စီးပွားဖြစ် အသုံးပြုမည်ဆိုပါက လစဉ်/နှစ်စဉ်ကြေး ပေးသွင်းရန် လိုအပ်ပါသည်။ ပိုမိုသိရှိရန် ဤနေရာကို နှိပ်ပါ။
ဒီဗီဒီယိုကို ၂၀၂၃ခုနှစ်၊ ဖေဖော်ဝါရီလ ၆ ရက်နေ့က Facebook ဒီလင့်ခ်မှာ မျှဝေထားပြီး ကြည့်ရှုမှုအကြိမ်ရေ ၁၄,၀၀၀ ကျော်ရှိနေပါတယ်။
ဒီဗီဒီယိုနဲ့အတူ “ယနေ့ တူရကီ (6.2.2023)” (မူရင်းအတိုင်း) ဆိုပြီး စာသားပါရှိပါတယ်။
ဒီဗီဒီယိုဟာ အာရဗီ၊ ပေါ်တူဂီ၊ ယူကရိန်း၊ တရုတ်ဘာသာစကားတွေနဲ့ ပို့စ်တွေမှာလည်း ပျံ့နှံ့နေပြီး ဖေဖော်ဝါရီလ ၆ ရက်နေ့က တူရကီအရှေ့တောင်ပိုင်းနဲ့ ဆီးရီးယား မြောက်ပိုင်းမှာရှိတဲ့ Gaziantep မြို့အနီး လှုပ်ခတ်သွားတဲ့ ပြင်းအား ၇.၈ မဂ္ဂနီကျုရှိတဲ့ ငလျင်ကြောင့်ဆိုပြီး မှားယွင်းပြောဆိုထားပါတယ်။
မလေးရှားသတင်းဌာနတစ်ခုဖြစ်တဲ့ Nanyang Siang Pau ကလည်း ဒီဗီဒီယိုကို တူရကီငလျင်အကြောင်းဖော်ပြထားတဲ့ ဒီတင်ပြချက်မှာ ထည့်သွင်းထားပါတယ်။
မြန်မာနိုင်ငံမှာလည်း တူညီတဲ့ပြောဆိုမှုနဲ့ ဒီဗီဒီယိုကို Facebook ဒီလင့်ခ်၊ ဒီလင့်ခ်နဲ့ ဒီလင့်ခ်တွေမှာ မျှဝေထားပါတယ်။
ဒီငလျင်လှုပ်ခတ်မှုကြောင့် ဖေဖော်ဝါရီလ ၁၃ ရက်နေ့အထိ သေဆုံးသူ ၃၃,၀၀၀ ကျော်ရှိနေပါတယ်။
ငလျင်လှုပ်ခတ်ပြီးနောက် ဆူနာမီဖြစ်ပွားခဲ့တယ်ဆိုတဲ့ ခိုင်လုံတဲ့သတင်းတွေကို AFP က မတွေ့ခဲ့ပါဘူး။
တောင်အာဖရိကနိုင်ငံက ရေလှိုင်းရိုက်ခတ်မှု
Google မှာ ဓာတ်ပုံရာဇဝင်ရှာကြည့်တဲ့အခါ ဒီဗီဒီယိုကို ၂၀၁၇ ခုနှစ်၊ မတ်လ ၁၄ ရက်နေ့က တောင်အာဖရိက Expresso Show ရုပ်သံသတင်းမှာ ဖော်ပြထားတာတွေ့ရပါတယ်။
“၂၀၁၇ ခုနှစ်၊ မတ်လ ၁၂ ရက်နေ့ တနင်္ဂနွေနေ့မှာ ကြီးမားတဲ့ ရေလှိုင်းပုတ်ခတ်မှုကြောင့် Durban တောင်ပိုင်းကမ်းခြေကို ယာယီပိတ်ခဲ့ရပါတယ်။” ဆိုပြီး ဗီဒီယိုဖော်ပြချက်မှာ ဆိုထားပါတယ်။
အောက်မှာနားလည်မှုလွဲစေတဲ့ပို့စ်က ဗီဒီယို Screenshot (ဘယ်) ကို Expresso Show ရဲ့ ဗီဒီယို Screenshot (ညာ)နဲ့ နှိုင်းယှဥ်ထားတာကို တွေ့နိုင်ပါတယ်။
လေပြင်းနဲ့ လှိုင်းပုတ်ခတ်မှုကြောင့် Durban ရဲ့ တောင်ပိုင်းကမ်းခြေမှာ ရေကူးမှုပိတ်ပင်ခဲ့တယ်လို့ တောင်အာဖရိကသတင်းဌာန eNCA က ဒီလင့်ခ်မှာ တင်ပြထားပါတယ်။
ဒါ့အပြင် ဒီဗီဒီယိုထဲက ပုံရိပ်တွေက Durban တောင်ပိုင်းကမ်းခြေရဲ့ Google Street View ပုံရိပ်တွေနဲ့ ကိုက်ညီမှုရှိနေပါတယ်။
အောက်မှာ နားလည်မှုလွဲစေတဲ့ပို့စ်က ဗီဒီယို Screenshot (ဘယ်)နဲ့ Google Maps က ဓာတ်ပုံ (ညာ) တို့ရဲ့ တူညီချက်တွေကို နှိုင်းယှဥ်ထားတာတွေ့နိုင်ပါတယ်။
တူရကီငလျင်လှုပ်ခတ်မှုနဲ့ ပတ်သက်တဲ့ မှားယွင်းပြောဆိုမှုတွေကို AFP က ဒီလင့်ခ်နဲ့ ဒီလင့်ခ်တွေမှာ အချက်အလက်စိစစ်ထားပါတယ်။
AFP အား အချက်အလက်စိစစ်စေလိုသည့်အကြောင်းအရာ သင့်ထံမှာ ရှိပါသလား။
ကျွန်ုပ်တို့ကို ဆက်သွယ်ရန်