တူရကီငလျင်လှုပ်ခတ်မှုဖြစ်ပွားပြီးနောက် နားလည်မှုလွဲစေတဲ့အချက်အလက်တွေနဲ့ ဓာတ်ပုံဟောင်းပျံ့နှံ့
- ဤဆောင်းပါးသည် သက်တမ်းတစ်နှစ်ကျော် ရှိနေပြီဖြစ်သည်။
- ပုံနှိပ်ဖော်ပြသည့်နေ့စွဲ 01 မတ် 2023 အချိန် 07h08
- ဖတ်ရန် ကြာချိန် 2 မိနစ်
- AFP ထိုင်း
AFP © မူပိုင်ခွင့် ၂၀၁၇-၂၀၂၅။ ဤစာမူကို စီးပွားဖြစ် အသုံးပြုမည်ဆိုပါက လစဉ်/နှစ်စဉ်ကြေး ပေးသွင်းရန် လိုအပ်ပါသည်။ ပိုမိုသိရှိရန် ဤနေရာကို နှိပ်ပါ။
မကြာသေးခင်က ပြင်းထန်တဲ့ ငလျင်လှုပ်ခတ်မှုကြောင့် တူရကီမှာ လူပေါင်း ၄၄,၀၀၀ ကျော်သေဆုံးခဲ့တဲ့အပြင် ဆီးရီးယားမှာလည်း ထောင်နဲ့ချီ သေဆုံးခဲ့ပြီးနောက် ဆယ်စုနှစ်နှစ်ခုကျော်က ဒီဓာတ်ပုံဟောင်းကို ၂၀၂၃ ခုနှစ်၊ ဖေဖော်ဝါရီလ ၁၅ ရက်နေ့က Facebook ဒီလင့်ခ်မှာ မျှဝေထားပါတယ်။
ဒီဓာတ်ပုံနဲ့အတူစာသားအချို့ကို အောက်မှာတွေ့နိုင်ပါတယ်။
“တူရကီမြေငလျင်မလှုပ်ခင် စက္ကန့်လေးဆယ်အလိုမှာ အောက်ပါပုဂ္ဂိုလ်ထံမှာ တိုက်သုံးလုံးရှိတယ်။ သူဌေးတစ်ယောက်ပဲ။ စက္ကန့် လေးဆယ်နောက်ပိုင်း ဒီပုဂ္ဂိုလ်ထံမှာ စားစရာ မရှိတော့ဘူး။ ဒီပုံမှာတွေ့ရတဲ့ မုန့်တွေက တခြားလူတွေက ပေးလိုက်တဲ့မုန့်ကိုယူပြီး ရပ်နေတာဖြစ်ပါတယ်။ အရာအားလုံးက မမြဲပါဘူးနော်။”(မူရင်းအတိုင်း)
၂၀၂၃ ခုနှစ်၊ ဖေဖော်ဝါရီ ၆ ရက်က လှုပ်ခတ်ခဲ့တဲ့ ငလျင်နဲ့ နောက်ဆက်တွဲငလျင်တွေကြောင့် တူရကီနိုင်ငံ တောင်ပိုင်းမှာ ပျက်စီးဆုံးရှုံးမှုတန်ဖိုး အမေရိကန်ဒေါ်လာ ၃၄ ဘီလီယံကျော် ရှိတယ်လို့ ကမ္ဘာ့ဘဏ်က ပြောခဲ့ပါတယ်။
ဒီပမာဏဟာ ၂၀၂၁ ခုနှစ်က တူရကီနိုင်ငံရဲ့ GDP လေးရာခိုင်နှုန်းနဲ့ညီမျှနေတယ်လို့ ဝါရှင်တန်အခြေစိုက် အဖွဲ့အစည်းက ပြောခဲ့ပြီး ဒီခန့်မှန်းချက်မှာ "နှစ်ဆပိုကြီးနိုင်ချေရှိတဲ့” ပြန်လည်တည်ဆောက်ရေးကုန်ကျစရိတ်တွေ ထည့်တွက်ထားခြင်းမရှိဘူးလို့ ဒီထုတ်ပြန်ချက်မှာ ဆိုထားပါတယ်။
ငလျင်ဒဏ်ခံခဲ့ရတဲ့ ဆီးရီးယားနိုင်ငံတောင်ပိုင်းက ပျက်ဆီးမှုတွေကိုလည်း ဒီခန့်မှန်းချက်မှာ ထည့်သွင်းထားခြင်းမရှိပါဘူး။
ဆက်လက်ဖြစ်ပွားနေတဲ့ နောက်ဆက်တွဲငလျင်တွေဟာ ဒီဘေးအန္တရာယ်ရဲ့ ပျက်စီးဆုံးရှုံးမှုတွေကို တိုးလာစေနိုင်တယ်လို့ ကမ္ဘာ့ဘဏ်ကသတိပေးပြောကြားခဲ့ပါတယ်။
ဒီဓာတ်ပုံကို နားလည်မှုလွဲစေတဲ့အချက်အလက်တွေနဲ့ မြန်မာ၊ ထိုင်း၊ ဘင်္ဂလားဒေ့ရှ်၊ အိန္ဒိယနဲ့ ကင်ညာနိုင်ငံတွေက လူမှုကွန်ရက်အသုံးပြုသူတွေက ပြန်လည်မျှဝေနေကြပါတယ်။
ဒီဓာတ်ပုံဟာ တူရကီနဲ့ ဆီးရီးယားငလျင်ကလို့ တိုက်ရိုက်ပြောဆိုထားတဲ့ Tweet တွေကိုလည်း ဒီလင့်ခ်နဲ့ ဒီလင့်ခ်တွေမှာ တွေ့နိုင်ပါတယ်။
ဒါပေမဲ့ Google မှာ ဓာတ်ပုံရာဇဝင်ရှာကြည့်တဲ့အခါ ဒီဓာတ်ပုံကို တူရကီနိုင်ငံပိုင်သတင်းဌာနတစ်ခုဖြစ်တဲ့ Anadolu Agency က ၁၉၉၉ ခုနှစ်၊ နိုဝင်ဘာလ ၁၃ ရက်နေ့က ဒီလင့်ခ်မှာ ဖော်ပြထားတာတွေ့ရပါတယ်။
ဒီဓာတ်ပုံအညွန်းစာသားမှာ “ပြင်းအား ၇ ဒသမ ၂ မဂ္ဂနီကျုရှိတဲ့ ငလျင်လှုပ်ခတ်မှုကြောင့် Duzce ဒေသတွင် အသက်အိုးအိမ် ဆုံးရှုံးမှုများဖြစ်ပွားခဲ့သည်။ ငလျင်ဒဏ်သင့်သူများကို မျှဝေပေးသည့် ပေါင်မုန့်များအားကိုင်ဆောင်ထားသူ ဒီအဖိုးအို၏ငိုကြွေးမှုက ထိရှတဲ့ပုံရိပ်တစ်ခုဖြစ်ပေါ်စေခဲ့သည်။” ဆိုပြီး ဖော်ပြထားပါတယ်။
တူရကီနိုင်ငံ အနောက်မြောက်ပိုင်း Duzce မြို့မှာ ၁၉၉၉ ခုနှစ်၊ နိုဝင်ဘာ ၁၂ ရက်က ပြင်းအား ၇ ဒသမ ၂ မဂ္ဂနီကျုရှိတဲ့ ငလျင်တစ်ခု လှုပ်ခတ်ခဲ့ပြီး လူ ၈၀၀ ကျော် သေဆုံးခဲ့ပါတယ်။
ဒီငလျင်လှုပ်ခတ်မှုမှာ အိမ်ခြေ ၁၂,၀၀၀ ကျော်နဲ့ ရုံးအဆောက်အအုံ ၂,၅၀၀ ကျော်ပျက်စီးဆုံးရှုံးခဲ့တယ်လို့ AFP က ဖော်ပြထားပါတယ်။
အောက်မှာ နားလည်မှုလွဲစေတဲ့ပို့စ်ကဓာတ်ပုံ (ဘယ်) ကို Anadolu Agency ရဲ့ ဓာတ်ပုံ (ညာ) နဲ့ Screenshot နှိုင်းယှဥ်ထားတာကို တွေ့နိုင်ပါတယ်။
ဒီအဖိုးအိုရဲ့ ဓာတ်ပုံတွေကို စီးရီးအနေနဲ့လည်း Anadolu Agency က ဒီလင့်ခ်မှာ ဖော်ပြထားပါတယ်။
ဒီဓာတ်ပုံတွေထဲမှာ သတင်းထောက် Abdurrahman Antakyali ကို ခရက်ဒစ်ပေးထားပြီး သူက ဒီဓာတ်ပုံကို ၂၀၁၄ ခုနှစ်၊ နိုဝင်ဘာလ ၁၂ ရက်နေ့က Twitter ပေါ်မှာ မျှဝေခဲ့ပါတယ်။
“Duzce ငလျင်က ဒီဓာတ်ပုံရိုက်ခဲ့တာ ၁၅ နှစ်ကြာခဲ့ပြီ။ အဲဒီအချိန်တုန်းက ကျွန်တော် ကမောက်ကမ ဖြစ်နေတဲ့အတွက် သူ့ရဲ့နာမည်ကိုတောင်မမေးခဲ့ရဘူး။” လို့သူက ဒီ Tweet မှာ ဆိုထားပါတယ်။
15 yıl olmuş bu fotoğrafı Düzce depreminde çekeli. Adını bile almamıştım o an kargaşada. Huzur içinde uyu Eşref Amca. pic.twitter.com/wV1znXvzTw
— AbdurrahmanAntakyali (@fotomuhabiri) November 12, 2014
၂၀၂၃ ခုနှစ် တူရကီ ဆီးရီးယားငလျင်နဲ့ ပတ်သက်တဲ့ မှားယွင်းပြီး နားလည်မှုလွဲစေတဲ့ ပို့စ်တွေကို AFP က ဒီလင့်ခ်မှာ အချက်အလက်စိစစ်ထားပါတယ်။
AFP အား အချက်အလက်စိစစ်စေလိုသည့်အကြောင်းအရာ သင့်ထံမှာ ရှိပါသလား။
ကျွန်ုပ်တို့ကို ဆက်သွယ်ရန်