တူရကီ-ဆီးရီးယားငလျင်ကြောင့် မိခင်ဆုံးရှုံးခဲ့ရတဲ့ ကလေးတွေလို့ ပြောဆိုထားတဲ့ TikTok ဗီဒီယိုဟောင်း ပျံ့နှံ့
- ဤဆောင်းပါးသည် သက်တမ်းတစ်နှစ်ကျော် ရှိနေပြီဖြစ်သည်။
- ပုံနှိပ်ဖော်ပြသည့်နေ့စွဲ 21 ဖေဖော်ဝါရီ 2023 အချိန် 06h44
- ဖတ်ရန် ကြာချိန် 1 မိနစ်
- AFP ကင်ညာ, AFP ထိုင်း
AFP © မူပိုင်ခွင့် ၂၀၁၇-၂၀၂၅။ ဤစာမူကို စီးပွားဖြစ် အသုံးပြုမည်ဆိုပါက လစဉ်/နှစ်စဉ်ကြေး ပေးသွင်းရန် လိုအပ်ပါသည်။ ပိုမိုသိရှိရန် ဤနေရာကို နှိပ်ပါ။
ပျံ့နှံ့နေတဲ့ ဗီဒီယိုကို ၂၀၂၃ ခုနှစ်၊ ဖေဖော်ဝါရီ ၁၁ ရက်က Facebook ရဲ့ ဒီလင့်ခ်မှာ တင်ခဲ့တာပါ။ အဲဒီဗီဒီယိုကို အကြိမ်ရေ ၃၅၃,၀၀၀ ကျော် ကြည့်ရှုခဲ့ကြပါတယ်။
“အစ်မသည် ဒုတိယမိခင်” ဆိုတဲ့ စာသားနဲ့အတူ ဗီဒီယိုကို မျှဝေခဲ့တာပါ။ အဲဒီပို့စ်မှာ အခုလိုလည်း ရေးထားပါတယ်။
“တူရကီငလျင်
အစ်မသည် မိခင်၏ အဓိကအစိတ်အပိုင်းတစ်ခုဖြစ်သည်
အမေ မရှိတာကို ဘယ်သူက ဖြည့်ဆည်းပေးလဲ
ဒီနေ့ ထပ်ပြီး သက်သေပြခဲ့ပါတယ်
ဒီဗီဒီယိုတွေ့ပြီမျက်ရည်ကျလာတယ် ” (မူရင်းအတိုင်း)
အဲဒီဗီဒီယိုကို Facebook အသုံးပြုသူထောင်သောင်းချီ ကြည့်ရှုခဲ့ကြပြီး ဗီဒီယိုထဲက ကလေးတွေအတွက် စိတ်မကောင်းဖြစ်ရတဲ့အကြောင်း ဝမ်းနည်းစကားတွေကိုလည်း ရေးသားခဲ့ကြပါတယ်။
Facebook အသုံးပြုသူတစ်ယောက်က “သနားလိုက်တာ ကလေးလေးရယ် သူ့အစ်မကိုလည်းအများကြီးသနားတယ်” ဆိုပြီး မှတ်ချက် (Comment) ရေးပါတယ်။
ဆီးရီးယားနဲ့ဆက်စပ်နေတဲ့ တူရကီအရှ့တောင်ပိုင်းဒေသမှာ ၂၀၂၃ ခုနှစ်၊ ဖေဖော်ဝါရီ ၆ ရက်က ၇ ဒသမ ၈ မဂ္ဂနီကျုပြင်းအားရှိတဲ့ ငလျင်တစ်ခုနဲ့ နောက်ဆက်တွဲငလျင်တွေ ပြင်းပြင်းထန်ထန် လှုပ်ခတ်ခဲ့ပါတယ်။
အဲဒီငလျင်ဟာ ရာစုနှစ်တစ်ခုအတွင်း ဥရောပဒေသမှာ “အဆိုးရွာဆုံး သဘာဝဘေး” ဖြစ်တယ်လို့ ကမ္ဘာ့ကျန်းမာရေးအဖွဲ့အစည်း (WHO) က ဖော်ပြခဲ့ပါတယ်။
ငလျင်လှုပ်ခတ်ခဲ့တဲ့နောက် အင်တာနက်လူမှုကွန်ရက်စာမျက်နှာတွေမှာ သတင်းမှားတွေ ပလူပျံခဲ့ပြီး အထူးသဖြင့် ငလျင်နောက်ဆက်တွဲအပျက်အစီးတွေလို့ဆိုထားတဲ့ ဓာတ်ပုံဟောင်း ဗီဒီယိုဟောင်းတွေ ပျံ့နှံ့ခဲ့ပါတယ်။ ပြောဆိုမှုအမှားတွေနဲ့ ပတ်သက်တဲ့ အချက်အလက်စိစစ်ချက်တွေကို AFP က ဒီလင့်ခ်၊ ဒီလင့်ခ် နဲ့ ဒီလင့်ခ်တွေမှာ ဖော်ပြခဲ့ပါတယ်။
တူညီတဲ့ပြောဆိုမှုနဲ့အတူ အဲဒီဗီဒီယိုကို Facebook ရဲ့ ဒီလင့်ခ်၊ ဒီလင့်ခ်နဲ့ ဒီလင့်ခ်တွေမှာလည်း မျှဝေထားပါတယ်။
ငလျင်ကြောင့် ကလေးငယ်များစွာရဲ့ မိဘတွေဆုံးရှုံးခဲ့ရတာတွေ ရှိပေမယ့် Facebook ပေါ်မှာ မျှဝေထားတဲ့ ဗီဒီယိုကတော့ အဟောင်းဖြစ်သလို အဆိုပါငလျင်နဲ့ပတ်သက်ဆက်နွှယ်မှုလည်း မရှိပါဘူး။
ဝမ်းနည်းစရာဗီဒီယိုမဟုတ်
ဗီဒီယိုရဲ့ ဘယ်ဘက်အပေါ်ပိုင်းမှာ တွေ့ရတဲ့ TikTok စာမျက်နှာ “anelya.495” ကို AFP က ရှာဖွေကြည့်ခဲ့ပါတယ်။
ရှာဖွေမှုအရ အဲဒီမူရင်းဗီဒီယိုကို ငလျင်မလှုပ်ခတ်မီ လအတော်ကြာ ၂၀၂၂ ခုနှစ်၊ နိုဝင်ဘာ ၂၆ ရက်ကတည်းက ဒီလင့်ခ်မှာ တင်ထားပြီးဖြစ်တာကို တွေ့နိုင်ပါတယ်။
ဗီဒီယိုရဲ့အောက်ခြေမှာ ရုရှားဘာသာစကားနဲ့ “ကလေးငယ်တွေရဲ့ ရယ်သံ” လို့ ရေးထားပါတယ်။
အဆိုပါ TikTok စာမျက်နှာရဲ့ အခြားဗီဒီယိုတွေမှာလည်း တူညီတဲ့ကလေးကို တွေ့ရပါတယ်။ သူတို့ရဲ့ဗီဒီယိုတွေဟာ မိသားစုနေ့စဉ်ဘဝထဲက ရယ်ရွှင်ဖွယ်အခိုက်အတန့်တွေကို ရိုက်ကူးထားတာ ဖြစ်ပါတယ်။
TikTok စာမျက်နှာပိုင်ရှင်ဆီကို AFP အချက်အလက်စိစစ်သူတွေက ဆက်သွယ်ထားပေမယ့် တစုံတရာအကြောင်းပြန်တာတော့ မရှိသေးပါဘူး။
AFP အား အချက်အလက်စိစစ်စေလိုသည့်အကြောင်းအရာ သင့်ထံမှာ ရှိပါသလား။
ကျွန်ုပ်တို့ကို ဆက်သွယ်ရန်