Pfizer ကိုဗစ်ကာကွယ်ဆေးကို ထိုင်းနိုင်ငံက ပိတ်ပင်လိုက်တယ်ဆိုတဲ့ မှားယွင်းပြောဆိုမှု ထိုင်းကျန်းမာရေးအာဏာပိုင်တွေ ငြင်းဆို
- ဤဆောင်းပါးသည် သက်တမ်းတစ်နှစ်ကျော် ရှိနေပြီဖြစ်သည်။
- ပုံနှိပ်ဖော်ပြသည့်နေ့စွဲ 17 ဖေဖော်ဝါရီ 2023 အချိန် 06h09
- ဖတ်ရန် ကြာချိန် 2 မိနစ်
- AFP ထိုင်း
AFP © မူပိုင်ခွင့် ၂၀၁၇-၂၀၂၅။ ဤစာမူကို စီးပွားဖြစ် အသုံးပြုမည်ဆိုပါက လစဉ်/နှစ်စဉ်ကြေး ပေးသွင်းရန် လိုအပ်ပါသည်။ ပိုမိုသိရှိရန် ဤနေရာကို နှိပ်ပါ။
"Pfizer Banned Thailand" ဆိုပြီး ၂၀၂၃ခုနှစ်၊ ဖေဖော်ဝါရီလ ၆ရက်နေ့က မျှဝေထားတဲ့ဒီပို့စ်ခေါင်းစဥ်မှာ အင်္ဂလိပ်ဘာသာစကားနဲ့ရေးသားထားပြီး "Pfizer ကို ထိုင်းနိုင်ငံမှာ ပိတ်ပင်လိုက်ပြီ" လို့ဆိုလိုတာဖြစ်ပါတယ်။
ဆက်လက်ပြီး ဒီပို့စ်မှာ "Pfizer ကိုဗစ်ကာကွယ်ဆေးထိုးနှံသူ ထိုင်းမင်းသမီး Coma. ဖြစ်ပေါ်ပြီးမေ့မြောနေရာ ထိုင်းပါမောက္ခတဦးမှ Pfizer ဆေးဝါးထုတ်လုပ်သူ ကုမ္ပဏီကို လျော်ကြေးငွေဒေါ်လာ ဘီလျံပေါင်းများစွာပေးလျော်ရန်အမှုတည်ဆောက် ကြိုးပမ်းနေပါတယ်။ ဆေးမဖြစ်ဘဲ ဘေးဖြစ်သွားတာ သတိပြုမှတ်သားစရာပါ။" (မူရင်းအတိုင်း) ဆိုပြီး ရေးသားထားပါတယ်။
ဒီပို့စ်နဲ့အတူ "ထိုင်းဘုရင့်သမီးတော် ကာကွယ်ဆေး booster ထိုးပြီး သတိမေ့မြောမှု ဖြစ်ပွားခဲ့ပြီးနောက် ထိုင်းနိုင်ငံမှ Pfizer ကို တားမြစ်ပိတ်ပင်" ဆိုတဲ့ခေါင်းစဥ်နဲ့ The European Union Times က ရေးသားထားတဲ့ဆောင်းပါးတစ်ခုရဲ့ Screenshot ကို မျှဝေထားပါတယ်။
ထိုင်းဘုရင် Maha Vajiralongkorn ရဲ့ အကြီးဆုံးသမီးတော်ဖြစ်တဲ့ မင်းသမီး Bajrakitiyabha Mahidol ဟာ ၂၀၂၂ ခုနှစ်၊ ဒီဇင်ဘာလက စစ်ခွေးသင်တန်းတစ်ခုမှာ ရုတ်တရက် မူးမေ့ လဲကျခဲ့ပြီးနောက် ထိုင်းအာဏာပိုင်တွေက "Pfizer စာချုပ်များကို ပျက်ပြယ်ကြောင်းကြေညာရန် ပြင်ဆင်နေသည်" ဆိုပြီး ဒီဆောင်းပါးမှာ ဆိုထားပါတယ်။
သက်တော် ၄၄ နှစ်ရှိပြီဖြစ်တဲ့ ဘုရင့်သမီးတော်နာမကျန်းဖြစ်မှုဟာ ကိုဗစ်-၁၉ ကာကွယ်ဆေးကြောင့်ဆိုတဲ့ ထင်ကြေးပေးမှုတွေ လူမှုကွန်ရက်စာမျက်နှာတွေမှာ ပျံ့နှံ့လာပြီး ကိုဗစ်-၁၉ ကာကွယ်ဆေးဆန့်ကျင်သူတွေက သူတို့ရဲ့ယုံကြည်မှုကို ထောက်ပံ့တဲ့အချက်အဖြစ် မျှဝေကြပါတယ်။
နန်းတွင်းသမားတော်တွေက ဘုရင့်သမီးတော်ရဲ့ နာမကျန်းမှုဟာ ကပ်ပါးပိုး ကူးစက်မှုကြောင့်ဖြစ်တယ်လို့ တော်ဝင်နန်းတော်ရဲ့ကြေညာချက်မှာ ဇန်နဝါရီလ ၇ ရက်နေ့က ထုတ်ပြန်ထားပါတယ်။
ဘုရင့်သမီးတော်ဟာ သတိပြန်မရသေးဘူးလို့ ဒီထုတ်ပြန်ချက်မှာ ဆိုထားပြီး ဖေဖော်ဝါရီလ ၁၅ ရက်နေ့အထိ သူမရဲ့ လက်ရှိအခြေအနေနဲ့ပတ်သက်လို့ ထပ်ပြီး သတင်းထုတ်ပြန်ထားတာ မရှိသေးပါဘူး။
ဒီဆောင်းပါးမှာ ကိုဗစ်-၁၉ နဲ့ပတ်သက်ပြီး ခိုင်လုံမှုမရှိတဲ့အချက်အလက်တွေကို မျှဝေမှုကြောင့် ဝေဖန်ခံခဲ့ရတဲ့ ထိုင်း-ဂျာမန် အဏုဇီဝဗေဒပညာရှင် Sucharit Bhakdi ပါဝင်တဲ့ ဗီဒီယိုတစ်ခုကိုလည်း မျှဝေထားပါတယ်။ ဘုရင့်သမီးတော်ဟာ Pfizer-BioNTech ကိုဗစ်-၁၉ ကာကွယ်ဆေးရဲ့ ဘေးထွက်ဆိုးကျိုးကို ခံစားလိုက်ရတာလို့ Sucharit Bhakdi က ဒီဗီဒီယိုထဲမှာ သက်သေအထောက်အထားမရှိဘဲ ဆိုထားပါတယ်။
တူညီတဲ့ပြောဆိုမှုတွေကို Facebook ဒီလင့်ခ်နဲ့ ဒီလင့်ခ်တွေမှာ မျှဝေထားပြီး ထိုင်းဘာသာစကား၊ တရုတ်ဘာသာစကားတွေနဲ့လည်း ပျံ့နှံ့နေပါတယ်။
ထိုင်းနိုင်ငံရဲ့ ကိုဗစ်ကာကွယ်ဆေးထိုးနှံမှုကို ၂၀၂၁ ခုနှစ်၊ ဖေဖော်ဝါရီလထဲမှာ စတင်ခဲ့ပြီး Pfizer-BioNTech၊ AstraZeneca၊ Sinovac နဲ့ Sinopharm ကာကွယ်ဆေးတွေကို ပြည်သူတွေအတွက်ဖြန့်ချိခဲ့ပါတယ်။ Moderna ကာကွယ်ဆေးတွေကိုတော့ ပုဂ္ဂိလိကဆေးရုံတွေမှာ အသုံးပြုခွင့်ပေးခဲ့ပါတယ်။
ထိုင်းနိုင်ငံရဲ့ ကိုဗစ်-၁၉ ကာကွယ်ဆေးပေါ်လစီဟာ ပြောင်းလဲမှုမရှိဘူးဆိုပြီး ထိုင်းပြည်သူ့ကျန်းမှာရေးအာဏာပိုင်တွေက လူမှုကွန်ရက်ပြောဆိုမှုတွေကို တုံ့ပြန်ခဲ့ပါတယ်။
ဖေဖော်ဝါရီလ ၉ ရက်နေ့အထိ "ထိုင်းနိုင်ငံရဲ့ ကိုဗစ်ကာကွယ်ဆေးပေါ်လစီ ပြောင်းလဲမှုမရှိပါဘူး" လို့ ထိုင်းနိုင်ငံ ရောဂါထိန်းချုပ်ရေးဌာန ဒုတိယညွှန်ကြားရေးမှူးချုပ် Kajornsak Kaewcharas က ပြောပါတယ်။
"Booster ကာကွယ်ဆေး နှစ်ကြိမ်အထိရရှိစေဖို့ဆိုတဲ့ တူညီတဲ့ရည်ရွယ်ချက်တွေနဲ့ ကာကွယ်ဆေးတွေကို ပြည်သူတွေလက်ခံရရှိစေဖို့ ဆက်လက်လုပ်ဆောင်သွားမယ်" လို့ သူက AFP ကိုပြောပါတယ်။
"ပြည်သူတွေ လက်ခံရရှိနေတဲ့ ကာကွယ်ဆေးတွေ(နဲ့ပတ်သက်ပြီး) အပြောင်းအလဲလုပ်မယ်ဆိုတဲ့ ဆွေးနွေးချက်တွေ အခုထိ မရှိပါဘူး"
ထိုင်းနိုင်ငံက Pfizer-BioNTech ကိုဗစ်ကာကွယ်ဆေးတွေကို တာမြစ်ပိတ်ပင်မယ်ဆိုတာ "သတင်းမှား" သာဖြစ်တယ်လို့ ထိုင်းပြည်သူ့ကျန်းမာရေးဌာနက ဖေဖော်ဝါရီလ ၃ ရက်နေ့မှာ ထုတ်ပြန်ပါတယ်။
ထိုင်းနိုင်ငံ အစားအသောက်နှင့် ဆေးဝါးကွပ်ကဲရေးဦးစီးဌာနက Pfizer-BioNTech Covid-19 ကာကွယ်ဆေးအချို့ရဲ့ သက်တမ်းကုန်ဆုံးရက်ကို ကိုးလမှ ၁၅ လအထိ သက်တမ်းတိုးမယ်လို့ ဖေဖော်ဝါရီ ၈ ရက်နေ့မှာ ကြေညာခဲ့ပါတယ်။
ကျန်းမာရေးဆိုင်ရာ သတင်းမှားတွေကို တုံ့ပြန်ပြောဆိုလေ့ရှိတဲ့ Meedan က ကျန်းမာရေးပညာရှင်တွေရဲ့ အဆိုအရ ကာကွယ်ဆေး သက်တမ်းကုန်ဆုံးရက် သက်တမ်းတိုးခြင်းက ကာကွယ်ဆေးဖြုန်းတီးမှုကို လျော့ကျစေပြီး ကာကွယ်ဆေးလက်ခံရရှိနိုင်မှုကို တိုးမြှင့်ပေးတယ်လို့ ဆိုပါတယ်။
"Pfizer ကိုဗစ်-၁၉ ကာကွယ်ဆေးဟာ ထုတ်လုပ်မှုရက်စွဲကနေ ၁၈ လအထိ အာနိသင်ပြောင်းလဲမှုမရှိဘဲ အန္တရာယ်ကင်းပြီး ထိရောက်မှုရှိတယ်" လို့ Meedan က AFP ကို ဖေဖော်ဝါရီလ ၁၄ ရက်နေ့မှာ ပြောပါတယ်။
ကိုဗစ်ကာကွယ်ဆေးနဲ့ပတ်သက်တဲ့ မှားယွင်းလုပ်ကြံပြောဆိုမှုတွေကို AFP က ဒီလင့်ခ်မှာ အချက်အလက်စိစစ်ထားပါတယ်။
AFP အား အချက်အလက်စိစစ်စေလိုသည့်အကြောင်းအရာ သင့်ထံမှာ ရှိပါသလား။
ကျွန်ုပ်တို့ကို ဆက်သွယ်ရန်
