မယ်တော်ဆေးခန်းတည်ထောင်သူ ဒေါက်တာစင်သီယာမောင်က “နှလုံးသွေးကြောရောဂါအတွက် သဘာဝဖြည့်စွက်စာ” တစ်ခုကိုထောက်ခံခဲ့တယ်ဆိုတဲ့ မှားယွင်းပြောဆိုမှု
- ဤဆောင်းပါးသည် သက်တမ်းတစ်နှစ်ကျော် ရှိနေပြီဖြစ်သည်။
- ပုံနှိပ်ဖော်ပြသည့်နေ့စွဲ 19 ဧပြီ 2023 အချိန် 06h36
- ဖတ်ရန် ကြာချိန် 2 မိနစ်
- AFP ထိုင်း
AFP © မူပိုင်ခွင့် ၂၀၁၇-၂၀၂၅။ ဤစာမူကို စီးပွားဖြစ် အသုံးပြုမည်ဆိုပါက လစဉ်/နှစ်စဉ်ကြေး ပေးသွင်းရန် လိုအပ်ပါသည်။ ပိုမိုသိရှိရန် ဤနေရာကို နှိပ်ပါ။
"ဆေးဆိုင်တွေက ဘာလို့ ငြိမ်နေကြတာလဲ? ဒီသဘာဝပါဝင်ပစ္စည်းကိုသုံးရင် သွေးတိုးရောဂါ ပျောက်ပါတယ်" (မူရင်းအတိုင်း) ဆိုပြီး မတ်လ ၂၃ ရက်နေ့က မျှဝေထားတဲ့ ဒီ Facebook ပို့စ်မှာ ဆိုထားပါတယ်။
ဒီပို့စ်မှာ ဒေါက်တာစင်သီယာမောင်က အင်တာဗျူးဖြေဆိုထားသလို လုပ်ကြံရေးသားထားတဲ့ ဘလော့ဂ်လင့်ခ်တစ်ခုကို မျှဝေထားပြီး ပြန်လည်မျှဝေမှုအကြိမ်ရေ ၅၀၀ ကျော်ရှိနေပါတယ်။
ဒေါက်တာစင်သီယာမောင်ဟာ ထိုင်း-မြန်မာနယ်စပ်က ရွှေ့ပြောင်းအလုပ်သမားတွေကို ကျန်းမာရေးစောင့်ရှောက်မှု အခမဲ့လုပ်ဆောင်ပေးမှုကြောင့် နိုင်ငံတကာရဲ့ ချီးကျူးဂုဏ်ပြုခံရတဲ့ မြန်မာနိုင်ငံက ဆရာဝန်တစ်ဦးဖြစ်ပါတယ်။
သွေးထွက်သံယို ဖြိုခွင်းမှုတွေနဲ့အဆုံးသတ်ခဲ့တဲ့ ၁၉၈၈ ခုနှစ် စစ်အုပ်ချုပ်ရေးကို ဆန့်ကျင်တဲ့ လူထုအုံကြွမှုအပြီး မြန်မာနိုင်ငံက ထွက်ခွာခဲ့ပြီးနောက်မှာ သူဟာ မယ်တော်ဆေးခန်းကို ဖွင့်လှစ်ခဲ့တာဖြစ်ပါတယ်။
ဒီဘလော့ဂ်ပို့စ်ရဲ့ စာသားအချို့ကို အောက်မှာတွေ့နိုင်ပါတယ်။
"စင်သီယာမောင် မြန်မာနိုင်ငံရှိ နာမည်ကြီး တက္ကသိုလ်တစ်ခုမှ(ပရော်ဖက်ဆာ- ပါမောက္ခ )ဖြစ်ပြီး နှလုံးရောဂါ အထူးကု ဆရာဝန်တစ်ဦးဖြစ်သည်။ သူသည် လူများကို ကူညီရာတွင် နာမည်ကြီးသော်လည်း ဓာတုနှင့် ဓာတုဖြည့်စွက်ဆေးများ မပါဝင်ပါ။ ပရော်ဖက်ဆာ ၏လူနာများထဲတွင် မြန်မာနိုင်ငံတွင် ကျော်ကြားသူများ ဖြစ်ကြပြီး ကာကွယ်ရန်အတွက် အခြားနိုင်ငံမှ လူနာများလည်း ရှိပါသည်။" (မူရင်းအတိုင်း)
ဒါ့အပြင် သူက နှလုံးရောဂါနဲ့ သွေးတိုးရောဂါလို ရောဂါအခြေအနေတွေကို ကာကွယ်နိုင်ဖို့ Cardiovax လို့ခေါ်တဲ့ဖြည့်စွက်ဆေးဝါးတစ်မျိုးကို သောက်သုံးဖို့ တိုက်တွန်းထားတယ်လို့ ဒီပို့စ်မှာပြောဆိုထားပါတယ်။
"ယနေ့မြန်မာနိုင်ငံတွင် ဤဆေးအတွက် ထိရောက်သောဖြည့်စွက်စာတစ်မျိုးတည်းသာရှိသည်။ အဲဒါကို Cardiovax လို့ခေါ်တယ်" (မူရင်းအတိုင်း) ဆိုပြီး သူကိုယ်တိုင်ပြောကြားခဲ့သလို ဒီပို့စ်မှာ ရေးသားထားပါတယ်။
Cardiovax ကိုထုတ်လုပ်တဲ့ အိန္ဒိယနိုင်ငံအခြေစိုက် Vokin Biotech ကုမ္ပဏီရဲ့ ဝဘ်ဆိုဒ်ပေါ်မှာတော့ သုတေသနလေ့လာမှုတွေအရ ဒီဆေးဟာ "သွေးကြောများ၏ အတွင်းပိုင်း (endothelial) အနားသားများ ကျန်းမာရေးကို ကောင်းမွန်စေပြီး ရောင်ရမ်းမှုကို လျှော့ချပေးသည်" ဆိုပြီး ဖော်ပြထားပေမယ့် ဒီလေ့လာမှုတွေနဲ့ပတ်သက်တဲ့ အချက်အလက်အသေးစိတ်ကို ဖော်ပြထားတာမရှိပါဘူး။
ခရမ်းချဉ်သီးနဲ့ ဖရဲသီးလို အနီရောင်နဲ့ ပန်းရောင် အစားအစာများမှ ရရှိတဲ့ ဓာတ်တိုးဆန့်ကျင်ပစ္စည်း (antioxidant) ဖြစ်တဲ့ လိုင်ကိုပင် (lycopene) ပါဝင်တယ်လို့ ဖော်ပြထားပြီး "အစွမ်းထက်တဲ့ ဓာတ်တိုးဆန့်ကျင်ပစ္စည်း antioxidant" ဟာ ကျန်းမာရေးအကျိုးကျေးဇူးများစွာရှိတယ်လို့ ထုတ်လုပ်သူက ဆိုပါတယ်။
ကျန်းမာရေးဆိုင်ရာ ကျွမ်းကျင်သူတွေက Cardiovax ဟာ ကျန်းမာရေးအတွက်အထောက်အကူဖြစ်စေတယ်ဆိုတဲ့ အထောက်အထားတွေမရှိဘူးလို့ ပြောပါတယ်။
တူညီတဲ့ပြောဆိုမှုနဲ့ ဒီပို့စ်ကို Facebook ဒီလင့်ခ်၊ ဒီလင့်ခ်နဲ့ ဒီလင့်ခ်တွေမှာမျှဝေထားပြီး ဒီဆေးကို သုံးစွဲလိုတဲ့ မှတ်ချက်တွေကိုလည်း တွေ့ရပါတယ်။
"သွေးတိုးရောဂါပျောက်တယ်ဆိုတာကိုကျေးဇူးတင်ပါတယ်ဗျာ ဘာဆေးလဲဘယ်နံမည်ဘယ်ခေါင်းစဥ်နဲဝယ်ရမှာလဲ" (မူရင်းအတိုင်း) ဆိုပြီး မှတ်ချက်တစ်ခုက ဆိုထားပြီး "ဆီးချိုရှိတဲ့သူစားလို့ရသလား" (မူရင်းအတိုင်း) ဆိုပြီး နောက်မှတ်ချက်တစ်ခုကို တွေ့ရပါတယ်။
ဒီဆေးကို ကြော်ငြာထားတဲ့ မှားယွင်းပြောဆိုမှုတွေကို ၂၀၂၂ ခုနှစ်ကလည်း AFP က ဒီလင့်ခ်မှာ အချက်အလက်စိစစ်ထားပါတယ်။
'သိပ္ပံနည်းကျ သက်သေအထောက်အထားမရှိ'
ကမ္ဘာ့နှလုံးအဖွဲ့ချုပ် သိပ္ပံကော်မတီရဲ့ ဥက္ကဌဖြစ်တဲ့ Dorairaj Prabhakaran က "Cardiovax ဆေးဟာ ကျန်းမာရေးအတွက်အထောက်အကူဖြစ်စေတယ်ဆိုတဲ့ အထောက်အထားတွေမရှိဘူး" လို့ ပြောပါတယ်။
"ကျန်းမာရေးနဲ့သင့်မြတ်တဲ့ အစားအသောက်တွေကတဆင့်ရရှိတဲ့ antioxidant ဓာတ်တွေဟာ နှလုံးရောဂါ၊ ဆီးချိုနဲ့ အချို့သော ကင်ဆာရောဂါလို နာတာရှည်ရောဂါတွေကို ကာကွယ်တဲ့နေရာမှာအကျိုးရှိတာတွေ့ရပေမဲ့ ဆေးဝါးဆိုင်ရာလေ့လာမှုစမ်းသပ်မှုတွေအရ ဒီဓာတ်တွေကို ဖြည့်စွက်စာ ဒါမှမဟုတ် ဆေးဝါးအနေနဲ့ ပြန်လည်ထုတ်လုပ်ထားတာမျိုးကတော့ ထိရောက်မှုမရှိဘူး" လို့ ဒေါက်တာ Prabhakaran က ပြောပါတယ်။
လတ်ဆတ်တဲ့အစားအစာတွေအများအပြားပါဝင်တဲ့ ကျန်းမာပြီးမျှတတဲ့ စားသောက်ပုံကသာ လိုအပ်တဲ့အဟာရဓာတ်ကို ရရှိစေနိုင်ပြီး နှလုံးသွေးကြောဆိုင်ရာ ရောဂါတွေကို ကာကွယ်ပေးနိုင်မှာဖြစ်တယ်လို့ သူက ဖြည့်စွက်ပြောကြားခဲ့ပါတယ်။
Meedan ရဲ့ ဒစ်ဂျစ်တယ်ကျန်းမာရေးဓာတ်ခွဲခန်းတာဝန်ခံဖြစ်တဲ့ Jenna Sherman ကလည်း Cardiovax ဆေးဟာ နှလုံးနဲ့ သွေးကြောတွေအတွက် အထောက်အကူဖြစ်စေတယ်ဆိုတဲ့ သိပ္ပံနည်းကျအထောက်အထားတွေမရှိဘူးလို့ ပြောပါတယ်။
"Cardiovax ရဲ့ ပါဝင်ပစ္စည်းအမှန်ကိုသိစေနိုင်တဲ့ လုပ်ဆောင်ချက်ပုံမှန်စံနှုန်းတွေမရှိတဲ့အပြင် ဒီပါဝင်ပစ္စည်းတွေဟာ စံနှုန်းမီ၊ မမီ သိရှိဖို့ခက်ခဲပါတယ်" လို့ သူက AFP ကိုပြောပါတယ်။
"ဖြည့်စွက်စာတွေဟာ အစားအသောက်နှင့် ဆေးဝါးကွပ်ကဲရေးဌာနတွေရဲ့ ထိန်းချုပ်မှုနဲ့ကင်းလွတ်နေပါတယ်။ ဒီဆေးဝါးတွေရဲ့ ပါဝင်ပစ္စည်းတွေကို သေသေချာချာစစ်ဆေးမှုနဲ့ စံချိန်စံညွှန်းအမီ အတည်ပြုမှုလုပ်ငန်းစဥ်တွေ မရှိတာကို ဆိုလိုတာဖြစ်ပါတယ်။ ဒီဟာရဲ့အကျိုးဆက်က ဖြည့်စွက်စာတွေဟာ အကျိုးထိရောက်မှုမရှိတဲ့အပြင် အန္တရာယ်လည်းဖြစ်စေနိုင်ပါတယ်။"
လိုင်ကိုပင် (lycopene) ဟာ နှလုံးကျန်းမာရေးကို ကောင်းမွန်စေတာ တွေ့ရပေမဲ့ ဖြည့်စွက်စာအဖြစ်ထက် အစားအသောက်တွေကရယူမှ အထိရောက်ဆုံးဖြစ်တဲ့အပြင် အလွန်အကျွံသုံးစွဲမှုအန္တရာယ်ရှိနိုင်တယ်လို့ သူက ဆိုပါတယ်။
အမေရိကန်နိုင်ငံ အစားအသောက်နှင့် ဆေးဝါးကွပ်ကဲရေးဌာနရဲ့ ခွင့်ပြုချက်ရဆေးဝါးစာရင်းမှာ Cardiovax ဆေး မပါဝင်တာတွေ့ရပါတယ်။
အင်တာဗျူးအတု
ဒေါက်တာစင်သီယာမောင်ရဲ့ မယ်တော်ဆေးခန်း ပြောရေးဆိုခွင့်ရှိသူက သူမဟာ ဘလော့ဂ်ပို့စ်က အင်တာဗျူးဖြေကြားထားတာမရှိသလို Cardiovax ကို သုံးစွဲဖို့ထောက်ခံပြောဆိုထားတာမရှိဘူးလို့ ပြောပါတယ်။
"မယ်တော်ဆေးခန်းက ဒီဆောင်းပါးကို မသိသလို ဒေါက်တာ စင်သီယာကလည်း ဒီလိုပြောဆိုထားတာမရှိပါဘူး။ အင်တာဗျူးလည်း မဖြေထားပါဘူး" လို့ ဆေးခန်းရဲ့ပြောရေးဆိုခွင့်ရှိသူတစ်ဦးက မတ်လ ၃၁ ရက်နေ့မှာ AFP ကိုပြောပါတယ်။
ဒါ့အပြင် ဒီဘလောဂ့်ပိုစ့်ကဓာတ်ပုံဟာ ထိုင်း-မြန်မာနယ်စပ်မှာ အသစ်ထပ်ဖွင့်မယ့် ဆေးခန်းအကြောင်းကို ဆွေးနွေးထားတဲ့ ၂၀၁၇ ခုနှစ်က Voice of America (VOA) အင်တာဗျူးက ရယူထားတာဖြစ်ပါတယ်။
စစ်အစိုးရ အကြီးအကဲ ဗိုလ်ချုပ်မှူးကြီး မင်းအောင်လှိုင် အာဆီယံ ထိပ်သီးအစည်းအဝေးတက်ရောက်ဖို့ ပိတ်ပင်ခံရပြီးနောက် ဒေါက်တာစင်သီယာမောင်ဟာ ဒီဆွေးနွေးပွဲကို မြန်မာနိုင်ငံကိုယ်စားပြု ဖိတ်ကြားခြင်းခံရတယ်ဆိုတဲ့ မှားယွင်းပြောဆိုမှုတွေ ယခင်ကလည်းပျံ့နှံ့ခဲ့ပါတယ်။
AFP အား အချက်အလက်စိစစ်စေလိုသည့်အကြောင်းအရာ သင့်ထံမှာ ရှိပါသလား။
ကျွန်ုပ်တို့ကို ဆက်သွယ်ရန်