‘စက်ရုပ်ဇနီး’နဲ့အတူတွေ့ရတဲ့ အီလွန်မတ်စ်လို့ ပြောဆိုထားတဲ့ နည်းပညာသုံးဓာတ်ပုံအတုများ

အဲဒီပုံတွေကို ၂၀၂၃ ခုနှစ်၊ မေလ ၁၆ ရက်က Facebook ဒီလင့်ခ်မှာ တင်ခဲ့တာ ဖြစ်ပြီး အောက်ပါအတိုင်း ရည်ညွှန်းစာရေးထားတာတွေ့ရပါတယ်။

“ဘီလျှံနာကြီး အီလွန်မတ်စ်
တို့ကုမ္ပဏီ ဟာ #စက်ရုပ်ဇနီး
တွေ တီထွင်နေတာ..နောက်ဆုံး
အဆင့်ကို ရောက်ရှိနေပါပြီး
2023 စက်တင်္ဘါလ မှာ
စျေးကွက် စဖြန့် မှာပါ။
၃ နာရီလောက် battery အား
သွင်းထားလိုက်တာနဲ့ တလလုံး
အသုံးပြုလို့ရပါတယ်။ wns” (မူရင်းအတိုင်း)

Image

မှားယွင်းတဲ့ပို့စ်ကို ၂၀၂၃ ခုနှစ်၊ မေလ ၃၀ ရက်က ရိုက်ယူခဲ့တဲ့ screenshot

ပို့စ်ကို အကြိမ်ရေ ၅၀ ကျော် ပြန်လည်မျှဝေထားကြပြီး ဓာတ်ပုံတွေထဲမှာ ‘စက်ရုပ်ဇနီးတွေ’နဲ့ တွဲကနေတဲ့ မတ်စ်ကို တွေ့ရပါတယ်။

ပုံတွေထဲက စက်ရုပ်တွေမှာ လူသားတွေရဲ့မျက်နှာသွင်ပြင်ရှိပြီး၊ ကိုယ်ထည်ကတော့ သတ္တုနဲ့ လူသဏ္ဍာန်အစိတ်အပိုင်းတွေ ရောပြီး တည်ဆောက်ထားတာ တွေ့ရပါတယ်။

“၃ နာရီလောက် Battery အားသွင်းထားလိုက်တာနဲ့ တစ်လလုံး အသုံးပြုလို့ရပါတယ်။” (မူရင်းအတိုင်း) လို့လည်း ရေးသားထားပါတယ်။

ဆင်တူတဲ့ပို့စ်တွေကို Facebook ဒီလင့်ခ်၊ ဒီလင့်ခ် နဲ့ ဒီလင့်ခ်တွေမှာလည်း တင်ခဲ့ပါတယ်။

ဒါပေမဲ့ အီလွန်မတ်စ်နဲ့ သူ့ကုမ္ပဏီဟာ ‘စက်ရုပ်ဇနီး’တွေ ထုတ်လုပ်ဖို့ ပြင်ဆင်နေတယ်ဆိုတဲ့အချက်ဟာ မှားယွင်းပါတယ်။

AI နဲ့ ဖန်တီးတဲ့ ဓာတ်ပုံတွေ

ဓာတ်ပုံတွေကို ရာဇဝင်ရှာကြည့်တဲ့အခါမှာတော့ မူရင်းပုံတွေကို “Guerrero Art” လို့ အမည်ပေးထားတဲ့ Facebook အသုံးပြုသူတစ်ဦးက “AI Art Universe” လို့ ခေါ်တဲ့ စာမျက်နှာတစ်ခု ဒီလင့်ခ် မှာ ၂၀၂၃ ခုနှစ်၊ မေလ ၃ ရက်က တင်ခဲ့တာ တွေ့ရပါတယ်။ (archived link)

အဲဒီ Facebook စာမျက်နှာဟာ “အလုပ်မှာ AI အသုံးပြုလိုသူတိုင်းအတွက် နေရာတစ်ခု” ဖြစ်တယ်လို့လည်း ဖော်ပြထားပါတယ်။

Image

မူရင်းပို့စ်ကို ၂၀၂၃ ခုနှစ်၊ မေလ ၂၄ ရက်က ရိုက်ယူခဲ့တဲ့ screenshot

AI ဆိုတာ ကွန်ပျူတာဉာဏ်ရည်တု (artificial intelligence) ကို ရည်ညွှန်းတာဖြစ်ပြီး အခုဆိုရင် အဲဒီနည်းပညာက အစစ်နီးပါးတူတဲ့ပုံတွေကို ဖန်တီးနိုင်လာပြီ ဖြစ်ပါတယ်။

AI နည်းပညာသုံးပြီး ဖန်တီးထားတဲ့ပုံတွေကြောင့် လူတွေမျက်စိလည်ခဲ့တဲ့ ဖြစ်ရပ်တွေလည်း ရှိလာပါတယ်။ အဲဒီနည်းပညာသုံးပြီး ဖန်တီးထားတဲ့ ယခင်အမေရိကန်သမ္မတ ဒေါ်နယ်ထရမ့်ကို ရဲအရာရှိတွေ ဝိုင်းဖမ်းနေတဲ့ ပုံတွေ၊ လေဖောင်းအင်္ကျီကို စတိုင်ကျကျဝတ်ဆင်ထားတဲ့ ပုပ်ရဟန်းမင်းကြီးရဲ့ပုံတွေလည်း လူမှုကွန်ရက်စာမျက်နှာတွေမှာ ပျံ့နှံ့ခဲ့ပါသေးတယ်။

ဒီဂျစ်တယ်ဖန်တီးသူ “digital creator” လို့ ကိုယ့်ကိုကိုယ်ရည်ညွှန်းထားတဲ့ Guerrero Art ရဲ့စာမျက်နှာမှာ AI နည်းပညာသုံးပြီး ဖန်တီးတဲ့ ဓာတ်ပုံတွေကို မကြာခဏ တင်တာ တွေ့ရပါတယ်။

၂၀၂၃ ခုနှစ်၊ မေလ ၂၁ ရက်မှာလည်း ဒီဇိုင်းဆန်းစက်ရုံတစ်ရုပ်၊ ကားပျံတစ်စီးပါဝင်တဲ့ အီလွန်မတ်စ်ရဲ့ ပုံတွေကို တင်ခဲ့ပါသေးတယ်။ (archived link)

ကားပျံပုံတွေပါဝင်တဲ့ပို့စ်မှာ Guerrero Art ရဲ့ Instagram စာမျက်နှာရဲ့အမည်ကို တွေ့နိုင်ပါတယ်။ (archived link)

Image

Instagram နာမည်ပါဝင်တဲ့ မူရင်းပို့စ်ကို ၂၀၂၃ ခုနှစ်၊ မေလ ၂၄ ရက်က ရိုက်ယူထားတဲ့ screenshot

သူတို့ရဲ့ Instagram ပေါ်မှာ တူညီတဲ့စက်ရုပ်ပုံတချို့ကို #ai #aiartwork #aicommunity စတဲ့ hashtags တွေနဲ့အတူ တင်ထားပါတယ်။

အဲဒီပုံတွေကို “Midjourney” လို့ခေါ်တဲ့ ကိရိယာသုံးပြီး ဖန်တီးခဲ့တာဖြစ်တယ်လို့ Instagram အသုံးပြုသူတစ်ဦးက မေးမြန်းတာကို Guerrero Art က ပြန်ဖြေခဲ့ပါတယ်။

Midjourney ဆိုတာ AI နည်းပညာကိရိယာတစ်ခုဖြစ်ပြီး အသုံးပြုသူတွေဆီက ပေးပို့လာတဲ့ စာသားတွေအပေါ်မူတည်ပြီး AI ဓာတ်ပုံတွေကို ဖန်တီးပေးပါတယ်။ အသုံးပြုနည်းကို ဒီ YouTube ဗီဒီယိုမှာ ကြည့်နိုင်ပါတယ်။ (archived link)

Image

မူရင်းပို့စ်နဲ့ အသုံးပြုသူရဲ့မေးမြန်းချက်ကို ၂၀၂၃ ခုနှစ်၊ မေလ ၂၄ ရက်က ရိုက်ယူထားတဲ့ screenshot

မူရင်း Facebook ပို့စ်မှာ ပုံတွေကိုဖန်တီးဖို့ ကွန်ပျူတာကို ညွှန်ကြားတဲ့စာသားတွေ (prompts) ကိုပါ ဖော်ပြထားသလို “အီလွန်မတ်စ်က AI ကို ထိန်းချုပ်မှုတွေရှိချင်ရတဲ့ အဓိက အကြောင်းအရင်း” ဆိုပြီးလည်း ရေးသားထားပါတယ်။

Image

ပုံတွေဖန်တီးဖို့အသုံးပြုခဲ့တဲ့ စာသားတွေကို ဖော်ပြထားတဲ့ မူရင်းပို့စ်ရဲ့ screenshot

နောက်ပြီး ပုံတွေကို ချဲ့ကြည့်တဲ့အခါ AI ပုံတွေရဲ့ ကွဲလွဲမှုနဲ့ အပြစ်အနာအဆာတချို့ကိုလည်း သတိထားမိခဲ့ပါတယ်။

ဥပမာ - “စက်ရုပ်ဇနီး”ပုံရဲ့ ညာဘက်လက်မှာ လက်သန်းကြွယ်ဟာ အပေါ်ဘက်ကို အနည်းငယ်ကွဲထွက်နေပြီး လက်ချောင်းတွေဟာလည်း သာမှန်နဲ့မတူဘဲ ပုံပန်းပျက်နေတာကို တွေ့ရပါတယ်။

Image

AI နဲ့ဖန်တီးတဲ့ စက်ရုံပုံနဲ့ ပုံပန်းပျက်နေတဲ့လက်ချောင်းတွေကို ရိုက်ယူထားတဲ့ screenshot

AI နည်းပညာသုံးပြီး ဖန်တီးထားတဲ့ပုံတွေ ဟုတ်မဟုတ် စိစစ်တဲ့နည်းတွေကို ဒီလင့်ခ်မှာ ဖတ်ရှုနိုင်ပါတယ်။

Tesla ကုမ္ပဏီရဲ့ စက်ရုပ်

အီလွန်မတ်စ် ပိုင်ဆိုင်တဲ့ နည်းပညာကုမ္ပဏီ Tesla ဟာ လူပုံသဏ္ဍာန်စက်ရုပ်တစ်မျိုးကို ဖန်တီးဖို့ ကြိုးစားနေပြီး “လူတွေအတွက် အန္တရာယ်များတဲ့၊ ထပ်ခါထပ်ခါလုပ်ရပြီး ပျင်းစရာကောင်းတဲ့အလုပ်တွေ”မှာ အသုံးပြုဖို့ ရည်ရွယ်တယ်လို့ ကုမ္ပဏီရဲ့ ဝဘ်ဆိုဒ်မှာ ဖော်ပြထားပါတယ်။ (archived link)

“Tesla Bot” လို့ ခေါ်တဲ့ အဲဒီစက်ရုပ်တွေဟာ အခုချိန်မှာ လမ်းဖြည်းဖြည်းလျှောက်နိုင်ပြီ ဖြစ်သလို အရာဝတ္ထုတွေကိုလည်း ကောက်ယူနိုင်ပြီလို့ ၂၀၂၃ ခုနှစ်၊ မေလ ၁၆ ရက်က ကုမ္ပဏီက ကြေညာခဲ့ပါတယ်။

ဒါပေမဲ့ Tesla ရဲ့ ဝဘ်ဆိုဒ်မှာ ကုမ္ပဏီက “စက်ရုပ်ဇနီး”တွေ ဖန်တီးတယ်ဆိုတဲ့ အကြောင်းအရာမျိုး လုံးဝမတွေ့ရသလို သူတို့ရဲ့ကြော်ငြာတွေမှာလည်း လူမျက်နှာသဏ္ဍာန်ရှိတဲ့ စက်ရုပ်ပုံတွေ ဖော်ပြထားခြင်း မရှိပါဘူး။