ရန်ကုန်မှာ မိုခါမုန်တိုင်းကြောင့် ‘အိမ်တွေကျွတ်ထွက်ကုန်ပြီ’ ဆိုပြီး ဗီဒီယိုအဟောင်းတွေပျံ့နှံ့
- ဤဆောင်းပါးသည် သက်တမ်းတစ်နှစ်ကျော် ရှိနေပြီဖြစ်သည်။
- ပုံနှိပ်ဖော်ပြသည့်နေ့စွဲ 01 ဇွန် 2023 အချိန် 07h16
- ဖတ်ရန် ကြာချိန် 2 မိနစ်
- AFP ထိုင်း
AFP © မူပိုင်ခွင့် ၂၀၁၇-၂၀၂၅။ ဤစာမူကို စီးပွားဖြစ် အသုံးပြုမည်ဆိုပါက လစဉ်/နှစ်စဉ်ကြေး ပေးသွင်းရန် လိုအပ်ပါသည်။ ပိုမိုသိရှိရန် ဤနေရာကို နှိပ်ပါ။
တစ်မိနစ်နဲ့ ခုနစ်စက္ကန့်ကြာဗီဒီယိုကို Facebook ပို့စ်တစ်ခုမှာ ၂၀၂၃ ခုနှစ်၊ မေလ ၉ ရက်နေ့က မျှဝေထားတာဖြစ်ပြီး ဗီဒီယိုနဲ့အတူ တွဲတင်ထားတဲ့စာသားက အခုလိုဖြစ်ပါတယ်။
“ရန်ကုန်ဆိပ်ကမ်းမှာ စ တိုက်နေပြီး အိမ်တွေပါ ကျွတ်ထွက်ကုန်ပြီ” (မူရင်းအတိုင်း)
မြန်မာနဲ့ အိမ်နီးချင်း ဘင်္ဂလားဒေ့ရှ်နိုင်ငံကို ၁ နာရီ မိုင် ၁၂၀ နှုန်းနဲ့ မုန်တိုင်းမိုခါဝင်ရောက်ပြီး မိုးသည်းသည်းထန်ထန် ရွာတဲ့အချိန်မှာ ဒီပို့စ်တွေ ပျံ့နှံ့လာတာဖြစ်ပါတယ်။
မုန်တိုင်းကြောင့် သေဆုံးသူ ၁၄၀ ကျော် ရှိခဲ့ပြီး အများစုကတော့ ရိုဟင်ဂျာဒုက္ခသည်တွေဖြစ်သလို ထိခိုက်ပျက်စီးမှုအများဆုံးရှိခဲ့တာလည်း ရခိုင်ပြည်နယ်ဖြစ်တဲ့အကြောင်း AFP သတင်းကို ဒီလင့်ခ်မှာ ဖတ်ရှုနိုင်ပါတယ်။
အလားတူပို့စ်တွေကို Facebook ရဲ့ ဒီလင့်ခ်နဲ့ ဒီလင့်ခ်၊ ဘလော့ဂ်ရဲ့ ဒီလင့်ခ်နဲ့ YouTube ရဲ့ ဒီလင့်ခ်နဲ့ ဒီလင့်ခ်တွေမှာလည်း တင်ထားပါသေးတယ်။
ဒါပေမဲ့ နားလည်မှုလွဲစေတဲ့ပို့စ်တွေမှာ ပြောဆိုထားသလိုမျိုး ရန်ကုန်မှာ နေအိမ်တွေ ကျွတ်ပါကုန်ပြီဆိုတဲ့ သက်သေအထောက်အထားမျိုး မတွေ့ရဘူးလို့ ရန်ကုန်မှာ ရှိတဲ့ AFP ဂျာနယ်လစ်တွေက ဆိုပါတယ်။
အဲဒါအပြင် မြန်မာမီးသတ်ဌာနရဲ့ တရားဝင် Facebook စာမျက်နှာမှာလည်း မုန်တိုင်းနဲ့ဆက်စပ် နောက်ဆုံးဆောင်ရွက်ချက်တွေကို အချိန်နဲ့တပြေးညီ တင်ထားပြီး လဲကျတဲ့သစ်ပင်တွေကို ဖယ်ရှားတဲ့အကြောင်းတွေ တွေ့ရပေမယ့် အိမ်တွေ ကျွတ်ပါကုန်တယ်၊ လွင့်ပါကုန်တယ်ဆိုတဲ့အချက်နဲ့ပတ်သက်လို့ တစ်စုံတရာပြောဆိုထားတာမျိုး မတွေ့ရပါဘူး (archived link)။
ဗီဒီယိုအဟောင်း
မှားယွင်းပြောဆိုထားတဲ့ဗီဒီယိုမှာ မုန်တိုင်းမိုခါမဝင်ရောက်ခင်က ဗီဒီယိုနှစ်ခုကို အသုံးပြုထားပါတယ်။
Google မှာ အဓိကကျတဲ့စကားလုံးတွေသုံးပြီး ရှာကြည့်တဲ့အခါ ပထမဗီဒီယိုကို Myanmar Now ရဲ့ YouTube ချန်နယ် ဒီလင့်ခ်မှာ ၂၀၂၃ ခု၊ ဧပြီလ ၂၄ က တင်ထားတာ တွေ့ရပါတယ် (archived link)။
ဗီဒီယိုရည်ညွှန်းစာက အခုလိုဖြစ်ပါတယ်။ “လူ ၈ဦး သေဆုံးခဲ့သည့် နေပြည်တော် လယ်ဝေး လေပြင်းတိုက်ခတ်မှု” (မူရင်းအတိုင်း)
အောက်မှာ ပို့စ်အမှားတွေမှာပါဝင်တဲ့ ဗီဒီယိုကလစ် (ဘယ်) နဲ့ Myanmar Now မှာတင်ထားတဲ့ ဗီဒီယို (ညာ) တို့ကို နှိုင်းယှဉ်ပြထားတဲ့ ဗီဒီယိုဖြစ်ပါတယ်။
အလားတူဗီဒီယိုကိုပဲ Tachileik News ကလည်း ၂၀၂၃ ခု၊ ဧပြီ ၂၂ က ဒီလင့်ခ်မှာ တင်ထားပါတယ် (archived link)။
ဆက်လက်ပြီး Google မှာ ဓာတ်ပုံရာဇဝင်ရှာတဲ့အခါ ဒုတိယဗီဒီယိုကို Facebook ဒီလင့်ခ်မှာ ၂၀၂၂ ခု၊ မတ် ၂၁ က တင်ထားတာ တွေ့ရပါတယ်။
ဗီဒီယိုရည်ညွှန်းစာက အခုလိုဖြစ်ပါတယ်။ “21.3.2022************ယနေ့ နေ့လည်ပိုင်းက ဘိတ်မြို့ သဲချောင်းရွာ အခြေအနေ။” (မူရင်းအတိုင်း)
မြန်မာမိုးလေဝသဌာနရဲ့ ထုတ်ပြန်ချက်အရ ၂၀၂၂ ခုနှစ် မတ်လ တုန်းက မုန်တိုင်းအာစနီကြောင့် မြန်မာနိုင်ငံရဲ့ တောင်ပိုင်းဒေသတွေမှာလည်း မုန်တိုင်းဒဏ်ခံခဲ့ရတယ်လို့ သိရပါတယ် (archived link)။
အောက်မှာ ဒုတိယဗီဒီယိုကလစ် (ဘယ်)နဲ့ ၂၀၂၂ ခုနှစ် Facebook ဗီဒီယို (ညာ) တို့ကို နှိုင်းယှဉ်ပြထားတဲ့ screenshoot ဖြစ်ပါတယ်။
AFP အား အချက်အလက်စိစစ်စေလိုသည့်အကြောင်းအရာ သင့်ထံမှာ ရှိပါသလား။
ကျွန်ုပ်တို့ကို ဆက်သွယ်ရန်