
ဟာရီကိန်းမီလ်တန် ရိုက်ခတ်မှုရဲ့ အပျက်အစီးတွေဆိုပြီး အခြားသဘာဝဘေးအန္တရာယ်တွေက ဓာတ်ပုံတွေ မှားယွင်းပျံ့နှံ့
- ပုံနှိပ်ဖော်ပြသည့်နေ့စွဲ 24 အောက်တိုဘာ 2024 အချိန် 09h09
- ဖတ်ရန် ကြာချိန် 4 မိနစ်
- AFP ထိုင်း
AFP © မူပိုင်ခွင့် ၂၀၁၇-၂၀၂၅။ ဤစာမူကို စီးပွားဖြစ် အသုံးပြုမည်ဆိုပါက လစဉ်/နှစ်စဉ်ကြေး ပေးသွင်းရန် လိုအပ်ပါသည်။ ပိုမိုသိရှိရန် ဤနေရာကို နှိပ်ပါ။
"Milton ဟာရီကိန်း မုန်တိုင်း ခြေမွသွားခဲ့တဲ့ ဖလော်ရီဒါပြည်နယ်" (မူရင်းအတိုင်း) ဆိုပြီး ၂၀၂၄ ခုနှစ်၊ အောက်တိုဘာလ ၁၂ ရက်က မျှဝေထားတဲ့ ဒီ Facebook ပို့စ်မှာ ရေးသားထားပါတယ်။
"တကမ္ဘာလုံး ကပ်ဘေးသင့်နေတာပါ" (မူရင်းအတိုင်း) ဆိုပြီးလည်း ရေးသားထားပါတယ်။
အိမ်အပျက်အစီးတွေရဲ့ အစိတ်အပိုင်းတွေနဲ့ ပြန့်ကျဲနေတဲ့ လူနေအိမ်ရပ်ကွက်တွေကို အမြင့်တစ်နေရာကနေ ရိုက်ကူးထားတဲ့ ဓာတ်ပုံတွေကို ဒီပို့စ်မှာ တွေ့ရပါတယ်။

အောက်တိုဘာလ ၉ ရက်က ဖလော်ရီဒါပင်လယ်ကွေ့ကမ်းရိုးတန်းကို ဟာရီကိန်းမီလ်တန် ဝင်ရောက်တိုက်ခတ်ခဲ့ပြီး လူ ၁၆ ဦး သေဆုံးမှုဖြစ်ပွားခဲ့တဲ့နောက် ဒီမှားယွင်းပို့စ်တွေ ပျံ့နှံ့လာတာဖြစ်ပါတယ်။ (Archived link)
ဒီမုန်တိုင်းကြီးကြောင့် လူနေအိမ်နဲ့ စီးပွားရေးလုပ်ငန်း ၂ သန်းကျော် လျှပ်စစ်မီး ပျက်တောက်ခဲ့ပြီး ခန့်မှန်းခြေ အမေရိကန်ဒေါ်လာ ၅၀ ဘီလီယံကျော် ပျက်စီးဆုံးရှုံးမှုတွေ ရှိခဲ့ပါတယ်။
တူညီတဲ့ ပြောဆိုမှုနဲ့ ဒီဓာတ်ပုံတွေကို Facebook ဒီလင့်ခ်နဲ့ ဒီလင့်ခ်တွေမှာလည်း မျှဝေထားပါတယ်။
ဒါပေမဲ့ ဒါဟာ ဟာရီကိန်းမီလ်တန်ရဲ့ ပျက်စီးမှုဓာတ်ပုံတွေ မဟုတ်ပါဘူး။
၂၀၂၃ ခုနှစ် မစ္စစ္စပီ လေဆင်နှာမောင်း
ပထမဓာတ်ပုံကို Google မှာ ဓာတ်ပုံရာဇဝင်ရှာဖွေကြည့်တဲ့အခါ မစ္စစ္စပီအလယ်ပိုင်းက မြို့တစ်မြို့ကို ပြားဝပ်သွားစေတဲ့ လေဆင်နှာမောင်းရိုက်ခတ်မှုအကြောင်းရေးသားထားတဲ့ ၂၀၂၃ ခုနှစ်၊ မတ်လ ၂၅ ရက် ရက်စွဲပါ The New York Times ဆောင်းပါးထဲက ဗီဒီယိုတစ်ခုကို တွေ့ရှိခဲ့ပါတယ်။ (Archived link)
ဒီဆောင်းပါးရဲ့ ဆောင်းစဥ်ကို "တောင်ပိုင်း လေဆင်နှာမောင်းကြောင့် လူ ၂၆ ဦး သေဆုံး" ဆိုပြီး ဖော်ပြထားပါတယ်။
ဗီဒီယိုရဲ့ ဘယ်ဘက်အပေါ်ပိုင်းမှာ “Rolling Fork, Miss” ဆိုတဲ့ စာသားပါရှိပြီး ဓာတ်ပုံဆရာ Rory Doyle ကို ရည်ညွန်းဖော်ပြထားပါတယ်။ (Archived link)
လူဦးရေ ၂,၀၀၀ အောက်ရှိတဲ့ Rolling Fork မြို့ဟာ ၂၀၂၃ ခုနှစ်၊ မတ်လ ၂၄ ရက်မှာ အမေရိကန်နိုင်ငံ မစ္စစ္စပီပြည်နယ်ကို ဝင်ရောက်ခဲ့တဲ့ လေဆင်နှာမောင်းတိုက်ခတ်မှုဒဏ်ကို ပြင်းထန်စွာ ခံစားခဲ့ရပါတယ်။ (Archived link)
အောက်မှာ မှားယွင်းပြောဆိုထားတဲ့ ပို့စ်က ဓာတ်ပုံ (ဘယ်) ကို The New York Times ရဲ့ ဗီဒီယိုရုပ်ပုံ (ညာ) နဲ့ နှိုင်းယှဥ်ထားတာကို တွေ့နိုင်ပါတယ်။

ဒီဗီဒီယိုတစ်ပိုင်းတစ်စကို The New York Times က X စာမျက်နှာပေါ်မှာလည်း မျှဝေခဲ့ပါတယ်။ (Archived link)
ဟာရီကိန်းမုန်တိုင်း အီယန်
ဒုတိယဓာတ်ပုံကို Google မှာ ဓာတ်ပုံရာဇဝင်ရှာဖွေကြည့်တဲ့အခါ "ဟာရီကိန်း အီယန်တိုက်ခတ်မှုနောက်ပိုင်း အပျက်အစီးရှင်းလင်းရေးလုပ်ငန်းများကို ဖလော်ရီဒါ ပင်လယ်ကွေ့ကမ်းခြေတွင် ဆက်လက်ပြုလုပ်" ဆိုတဲ့ ခေါင်းစဥ်နဲ့ Getty Images ဝဘ်ဆိုဒ်မှာ ၂၀၂၂ ခုနှစ်၊ အောက်တိုဘာလ ၃ ရက်က မျှဝေထားတာကို တွေ့ရပါတယ်။ (Archived link)
ဓာတ်ပုံဆရာ Win McNamee ကို ဓာတ်ပုံရိုက်ကူးသူအဖြစ် ရည်ညွန်းဖော်ပြထားပါတယ်။
"ဤဝေဟင်ဓာတ်ပုံတွင် ဟာရီကိန်း အီယန် ရိုက်ခတ်မှုနောက်ပိုင်း ကျန်ရှိခဲ့သည့် ပျက်စီးမှုများနှင့် ဖလော်ရီဒါပြည်နယ်၊ Fort Myers ကမ်းခြေအား ၂၀၂၂ ခုနှစ်၊ အောက်တိုဘာလ ၂ ရက်တွင် တွေ့ရစဥ်။ ဖလော်ရီဒါပြည်နယ် အနောက်တောင်ပိုင်းတွင် ပျက်စီးမှုအများအပြား ဖြစ်ပွားစေခဲ့သည့် ပြင်းအားအဆင့် ၄ ရှိသည့် ဟာရီကိန်းအီယန်ကြောင့် Fort Myers ကမ်းခြေတွင် ကြီးမားသည့် ဆုံးရှုံးမှုများဖြစ်ပွားခဲ့သည်။" ဆိုပြီး ဓာတ်ပုံအညွှန်းစာ ပါရှိပါတယ်။
အောက်မှာ မှားယွင်းပြောဆိုထားတဲ့ပို့စ်က ဓာတ်ပုံ (ဘယ်) ကို Getty Images ဓာတ်ပုံ (ညာ) နဲ့ နှိုင်းယှဥ်ထားတာ တွေ့နိုင်ပါတယ်။

မက္ကဆီကိုပင်လယ်ကွေ့ကမ်းခြေမှာတည်ရှိတဲ့ Fort Myers မြို့ဟာ ၂၀၂၂ ခုနှစ်၊ စက်တင်ဘာလနောင်းပိုင်းမှာ ဖလော်ရီဒါပြည်နယ်ကို ဝင်ရောက်တိုက်ခတ်ခဲ့တဲ့ အဆင့် ၄ ရှိ အင်အားပြင်း ဟာရီကိန်းမုန်တိုင်းရဲ့ ဗဟိုချက် ဖြစ်ခဲ့ပါတယ်။ (Archived link)
တတိယဓာတ်ပုံကို Getty Images ဝဘ်ဆိုဒ်ကပဲ ၂၀၂၂ ခုနှစ်၊ စက်တင်ဘာလ ၂၉ ရက်မှာ ထုတ်ဝေခဲ့ပြီး Joe Raedle ကို ဓာတ်ပုံရိုက်ကူးသူအဖြစ် ရည်ညွန်းဖော်ပြထားပါတယ်။ (Archived link)
ဖလော်ရီဒါပြည်နယ်ရှိ Fort Myers မြို့ကို ဟာရီကိန်းအီယန် ရိုက်ခတ်ခဲ့တဲ့နောက် အဆောက်အအုံအပျက်အစီးတွေရဲ့ ဝေဟင်ပြဓာတ်ပုံလို့ အညွှန်းစာမှာ ဖော်ပြထားပါတယ်။
အောက်မှာ မှားယွင်းပြောဆိုထားတဲ့ပို့စ်ကဓာတ်ပုံ (ဘယ်) ကို Getty Images ဓာတ်ပုံ (ညာ) နဲ့ နှိုင်းယှဥ်ထားတာကို တွေ့နိုင်ပါတယ်။

ဟာရီကိန်းမုန်တိုင်း မိုက်ကယ်လ်
နောက်ဆုံးဓာတ်ပုံကို Google မှာ ဓာတ်ပုံရာဇဝင်ရှာဖွေကြည့်တဲ့အခါ ဒီဓာတ်ပုံကို Reuters ဓာတ်ပုံမော်ကွန်းမှာ ဖော်ပြထားတာတွေ့ရပါတယ်။ (Archived link)
"၂၀၁၈ ခုနှစ်၊ အောက်တိုဘာလ ၁၁ ရက်၊ အမေရိကန်ပြည်ထောင်စု၊ ဖလော်ရီဒါပြည်နယ်ရှိ မက္ကစီကိုကမ်းခြေမှ ဟာရီကိန်းမိုက်ကယ်လ် တိုက်ခတ်မှုနောက်ဆက်တွဲ အပျက်အစီးများကြားတွင်တွေ့ရသည့် အမေရိကန်အလံ" ဆိုပြီး စာသားပါရှိပါတယ်။
Jonathan Bachman ကို ဓာတ်ပုံရိုက်ကူးသူအဖြစ် ရည်ညွန်းဖော်ပြထားပါတယ်။
အောက်မှာ မှားယွင်းပြောဆိုထားတဲ့ ပို့စ်ကဓာတ်ပုံ (ဘယ်) ကို Reuters ဓာတ်ပုံ (ညာ) နဲ့ နှိုင်းယှဥ်ထားတာ တွေ့နိုင်ပါတယ်။

ပြင်းအားအဆင့် ၅ ရှိတဲ့ ဟာရီကိန်းမိုက်ကယ်လ်ဟာ ၂၀၁၈ ခုနှစ်၊ အောက်တိုဘာလ ၁၀ ရက်မှာ ဖလော်ရီဒါပြည်နယ်ကို ဝင်ရောက်ခဲ့ပြီး လူအနည်းဆုံး ၇၄ ဦး သေဆုံးစေခဲ့သလို ခန့်မှန်းခြေ အမေရိကန်ဒေါ်လာ ၂၅ ဘီလီယံကျော် ပျက်စီးဆုံးရှုံးမှုတွေ ဖြစ်ပေါ်စေခဲ့ပါတယ်။ (Archived link)
ဟာရီကိန်းမီလ်တန်ရဲ့ အပျက်အစီးတွေဆိုပြီး မုန်တိုင်းဟောင်းတွေရဲ့ ပျက်စီးမှုဗီဒီယိုတွေကို မှားယွင်းမျှဝေထားတဲ့ ပို့စ်တွေကိုလည်း AFP က ဒီလင့်နဲ့ ဒီလင့်ခ်တွေမှာ အချက်အလက် စိစစ်ခဲ့ပါတယ်။
AFP အား အချက်အလက်စိစစ်စေလိုသည့်အကြောင်းအရာ သင့်ထံမှာ ရှိပါသလား။
ကျွန်ုပ်တို့ကို ဆက်သွယ်ရန်