ထိုင်းနိုင်ငံက ကယ်ဆယ်ရေးသူရဲကောင်းခွေးကလေးဆိုပြီး ဓာတ်ပုံဟောင်းမှားယွင်းပျံ့နှံ့
- ပုံနှိပ်ဖော်ပြသည့်နေ့စွဲ 02 ဧပြီ 2025 အချိန် 06h31
- ဖတ်ရန် ကြာချိန် 2 မိနစ်
- Chayanit ITTHIPONGMAETEE, AFP ထိုင်း
AFP © မူပိုင်ခွင့် ၂၀၁၇-၂၀၂၅။ ဤစာမူကို စီးပွားဖြစ် အသုံးပြုမည်ဆိုပါက လစဉ်/နှစ်စဉ်ကြေး ပေးသွင်းရန် လိုအပ်ပါသည်။ ပိုမိုသိရှိရန် ဤနေရာကို နှိပ်ပါ။
"နာရီပိုင်းအတွင်းနဲ့ပဲ အသက်ပေါင်း10ကျော်ကို သူတို့အဖွဲ့ရဲ့မန်းရှင်းအတိုင်း ကြိုးစားလုပ်ဆောင် အနံ့ခံ ပေးကာ အချက်ပြ ထောက်ပြ ရင်း အတိအလင်းအထဲက လူတွေရှိရာကို ကယ်ဆယ်ပြပေးနိုင်ခဲ့တဲ့ ချစ်ရတဲ့ထိုင်းကယ်ဆယ်ရေး Bravoခွေးအမည်K9လေး" (မူရင်းအတိုင်း) ဆိုပြီး ၂၀၂၅ ခုနှစ်၊ မတ်လ ၃၁ ရက်ကပို့စ်မှာ ရေးသားထားပါတယ်။
ပြန်လည်မျှဝေမှုအကြိမ်ရေ ၁၁,၀၀၀ ကျော်ရှိတဲ့ ဒီပို့စ်မှာ အပျက်အစီးတွေကြား ပိတ်မိနေသူတွေကို ရှာဖွေပေးနေတဲ့ ခွေးတစ်ကောင်ရဲ့ ဓာတ်ပုံတွေ တွေ့ရပါတယ်။
မတ်လ ၂၈ ရက်နေ့ အင်အားပြင်း မြေငလျင်လှုပ်ခတ်မှုကြောင့် ဘန်ကောက်မြို့ရှိ ဆောက်လက်စ အဆောက်အအုံတစ်ခု ပြိုကျခဲ့ပြီးနောက် တူညီတဲ့ပြောဆိုမှုတွေနဲ့ ဒီဓာတ်ပုံတွေ ပျံ့နှံ့လာခဲ့ပါတယ်။
ထိုင်းနိုင်ငံရဲ့ မြို့တော်ဘန်ကောက်မှာ အနည်းဆုံး လူ ၂၀ ဦးသေဆုံးခဲ့တယ်လို့ မြို့တော်အာဏာပိုင်တွေက ထုတ်ပြန်ထားပါတယ်။ (Archived link)
သေဆုံးသူအများစုဟာ ပြိုကျသွားတဲ့ အထပ်မြင့်အဆောက်အအုံမှာ လုပ်ကိုင်နေတဲ့ အလုပ်သမားတွေဖြစ်ကြပြီး ပျောက်ဆုံးနေသူအများစုဟာလည်း ဒီအဆောက်အအုံရဲ့ အပျက်အစီးတွေအောက် ပိတ်မိနေသူတွေဖြစ်တယ်လို့ ဆိုပါတယ်။
ကမ္ဘာလှည့်ခရီးသည်တွေကြား ကျော်ကြားတဲ့ Chatuchak စျေးအနီးမှာရှိတဲ့ အဆောက်အအုံရဲ့ အပြိုအပျက်တွေကြား အသက်ရှင်ပိတ်မိနေသူတွေကို ရှာဖွေနိုင်ဖို့ အနံ့ခံခွေးတွေအပြင် ကိုယ်အပူချိန်တိုင်းတာပြီး ပုံရိပ်ဖော်ပေးတဲ့ ဒရုန်းတွေကိုလည်း ဖြန့်ကျက်ထားပါတယ်။
ပြင်းအား ၇ ဒဿမ ၇ မဂ္ဂနီကျူရှိတဲ့ မြေငလျင်လှုပ်ခတ်မှုကြောင့် မြန်မာနိုင်ငံမှာ လူပေါင်း ၂,၀၀၀ ကျော်သေဆုံးခဲ့ပြီး ငလျင်ဒဏ်ကို အပြင်းထန်ဆုံးခံစားခဲ့ရတဲ့ မန္တလေးမြို့မှာ ပိတ်မိနေသူတွေကို အသက်ရှင်လျက်ကယ်ဆယ်နိုင်ရေး မျှော်လင့်ချက်တွေ တဖြည်းဖြည်း မှေးမှိန်နေပါတယ်။
Google မှာ ဓာတ်ပုံရာဇဝင်ရှာဖွေကြည့်တဲ့အခါ ဒီဓာတ်ပုံတွေကို Shutterstock ဝဘ်ဆိုဒ်မှာ ဖော်ပြထားပြီး ချက်ဓာတ်ပုံဆရာ Jaroslav Noska ကို ဓာတ်ပုံရိုက်ကူးသူအဖြစ် ရည်ညွှန်းဖော်ပြထားပါတယ်။ (Archived link)
ဓာတ်ပုံသုံးပုံစလုံးမှာ "ငလျင်လှုပ်ခတ်ပြီးနောက် ခွေးတစ်ကောင်က ဒဏ်ရာရသူတွေကို အပျက်အစီးတွေကြား ရှာဖွေနေပုံ" ဆိုပြီး တူညီတဲ့ဓာတ်ပုံအညွှန်းစာ ပါရှိပါတယ်။ (Archived here, here and here)
ဒီဓာတ်ပုံတွေကို ဘယ်နေရာ၊ ဘယ်အချိန်မှာ ရိုက်ကူးခဲ့သလဲဆိုတာကိုတော့ Shutterstock က ဖော်ပြထားခြင်းမရှိပါဘူး။
အခြားငလျင်လှုပ်ခတ်မှုတွေမှာ ဒီဓာတ်ပုံတွေကို မှားယွင်းဖော်ပြခဲ့ကြတာတွေကို AFP က ကခင်ကလည်း အချက်အလက်စိစစ်ခဲ့ပါတယ်။
နောက်ထပ်ဓာတ်ပုံရောင်းချရေး ဝဘ်ဆိုဒ်တစ်ခုဖြစ်တဲ့ Alamy မှာလည်း ဒီဓာတ်ပုံသုံးပုံထဲက နှစ်ပုံကို ၂၀၁၈ ခုနှစ်၊ အောက်တိုဘာလ ၁၈ ရက်မှာ ရိုက်ကူးထားတယ်လို့ ဖော်ပြထားပါတယ်။ (Archived here and here)
"ဒီဓာတ်ပုံနှစ်ပုံစလုံးကို ၂၀၁၈ ခုနှစ်၊ အောက်တိုဘာလမှာ တူညီတဲ့ပံ့ပိုးသူတစ်ဦးက မျှဝေထားတာဖြစ်ပါတယ်" လို့ Alamy ကုမ္ပဏီရဲ့ ပြောရေးဆိုခွင့်ရှိသူတစ်ဦးက AFP ကို ပြောခဲ့ပါတယ်။
AFP အား အချက်အလက်စိစစ်စေလိုသည့်အကြောင်းအရာ သင့်ထံမှာ ရှိပါသလား။
ကျွန်ုပ်တို့ကို ဆက်သွယ်ရန်