နယူးဇီလန်ငလျင်ဓာတ်ပုံဟောင်းကို မြန်မာငလျင်အပျက်အစီးဆိုပြီး မှားယွင်းမျှဝေ
- ပုံနှိပ်ဖော်ပြသည့်နေ့စွဲ 03 ဧပြီ 2025 အချိန် 06h41
- ဖတ်ရန် ကြာချိန် 2 မိနစ်
- AFP ထိုင်း
AFP © မူပိုင်ခွင့် ၂၀၁၇-၂၀၂၅။ ဤစာမူကို စီးပွားဖြစ် အသုံးပြုမည်ဆိုပါက လစဉ်/နှစ်စဉ်ကြေး ပေးသွင်းရန် လိုအပ်ပါသည်။ ပိုမိုသိရှိရန် ဤနေရာကို နှိပ်ပါ။
"တောင်ကြီး ငလျင်လှုပ်တာကြောက်စရာကြီး" (မူရင်းအတိုင်း) ဆိုပြီး မတ်လ ၂၈ ရက်က မျှဝေထားတဲ့ ပို့စ်မှာ ရေးသားထားပါတယ်။
တောင်ကြီးမြို့ဟာ မြေငလျင်ဗဟိုချက်ဖြစ်ခဲ့တဲ့ စစ်ကိုင်းတိုင်းရဲ့ အရှေ့တောင်ဘက် ၁၆၇ ကီလိုမီတာအကွာ (၁၀၄ မိုင်) မှာ တည်ရှိပါတယ်။ မတ်လ ၂၈ ရက်က သိပ်မနက်တဲ့ မဂ္ဂနီကျူ့ ၇ ဒဿမ ၇ ပြင်းအားရှိငလျင်လှုပ်ခတ်မှုကြောင့် လမ်းတွေပျက်စီးခဲ့တဲ့အပြင် အဆောက်အအုံပြိုပျက်မှုတွေကို မြန်မာနိုင်ငံအလယ်ပိုင်းက မြို့ကြီးတွေအပြင် ထိုင်းနိုင်ငံ ဘန်ကောက်မြို့တွေအထိပါ ဖြစ်ပွားခဲ့ပါတယ်။ (Archived link)
ငလျင်လှုပ်ခတ်မှုကြောင့် လူ ၂,၇၁၉ ဦး သေဆုံးပြီး လူ ၄,၅၀၀ ကျော် ဒဏ်ရာရရှိခဲ့တဲ့အပြင် ၄၄၁ ဦး ပျောက်ဆုံးလျက်ရှိတယ်လို့ မြန်မာစစ်အစိုးရက ဧပြီလ ၂ ရက်နေ့မှာ ထုတ်ပြန်ထားပါတယ်။
ဒီဘေးအန္တရာယ်နောက်ပိုင်း ကယ်ဆယ်ရေးတွေကို အတတ်နိုင်ဆုံးလုပ်ဆောင်သွားမယ်လို့ မြန်မာစစ်အစိုးရကပြောပေမယ့် ငလျင်လှုပ်ခတ်ပြီး သိပ်မကြာခင် ပြီးခဲ့တဲ့ရက်ပိုင်းတွေမှာ စစ်အစိုးရကို ဆန့်ကျင်တဲ့ လက်နက်ကိုင်တပ်ဖွဲ့တွေရဲ့ နယ်မြေတွေကို စစ်တပ်က ဆက်လက် ဗုံးကျဲတိုက်ခိုက်တာတွေ ရှိနေပါတယ်။
မြန်မာနိုင်ငံက ငလျင်လှုပ်ခတ်မှုအပျက်အစီးဆိုတဲ့ မှားယွင်းပြောဆိုမှုနဲ့အတူ ဒီဓာတ်ပုံကို Facebook အသုံးပြုသူတွေက အကြိမ်ကြိမ်မျှဝေထားကြပါတယ်။
ဒါပေမဲ့ ဒီဓာတ်ပုံဟာ နယူးဇီလန်နိုင်ငံမှာ ၂၀၁၁ ခုနှစ်က ရိုက်ကူးထားတာဖြစ်ပါတယ်။
Google မှာ ဓာတ်ပုံရာဇဝင်ရှာဖွေကြည့်တဲ့အခါ ဒီဓာတ်ပုံကို ဗြိတိန်အခြေစိုက် ဓာတ်ပုံရောင်းချရေး ဝဘ်ဆိုဒ်တစ်ခုဖြစ်တဲ့ Alamy က ၂၀၁၁ ခုနှစ်၊ မတ်လ ၂၀ ရက်မှာ မျှဝေထားတာ တွေ့ရပါတယ်။ (Archived link)
"ကြီးမားတဲ့ငလျင်လှုပ်ခတ်မှုကြောင့် Christchurch မြို့တွင် လမ်းအက်ကွဲမှုကြီးတွေပေါ်ပေါက်" ဆိုပြီး ဓာတ်ပုံအညွှန်းစာပါရှိပါတယ်။ ဒါအပြင် ဒီဓာတ်ပုံကို Avon မြစ်ပေါ်ရှိ Fitzgerald Avenue တံတားမှာ ရိုက်ကူးထားတယ်လို့ ဆိုပါတယ်။
၂၀၁၁ ခုနှစ်၊ ဖေဖော်ဝါရီလ ၂၃ ရက်မှာ နယူးဇီလန်နိုင်ငံ၊ Christchurch မြို့ကို မဂ္ဂနီကျူ့ ၆ ဒဿမ ၃ ပြင်းအားရှိ ငလျင်တစ်ခုလှုပ်ခတ်ခဲ့ပါတယ်။ ဒီငလျင်လှုပ်ခတ်မှုကြောင့် လူ ၁၈၅ ဦး သေဆုံးခဲ့ပြီး အမေရိကန်ဒေါ်လာ သန်းထောင်နဲ့ချီတဲ့ ပျက်စီးဆုံးရှုံးမှုတွေ ရှိခဲ့ပါတယ်။ (Archived link)
ဒီဓာတ်ပုံရိုက်ကူးထားတဲ့ တည်နေရာကို ၂၀၀၇ ခုနှစ်က ရိုက်ကူးထားတဲ Google Street View ဓာတ်ပုံနဲ့ နှိုင်းယှဥ်ပြီး အတည်ပြုနိုင်ခဲ့ပါတယ်။ (Archived link)
AFP အား အချက်အလက်စိစစ်စေလိုသည့်အကြောင်းအရာ သင့်ထံမှာ ရှိပါသလား။
ကျွန်ုပ်တို့ကို ဆက်သွယ်ရန်