AI အမှတ်အသားနဲ့ ဗီဒီယိုတစ်ခုကို မြန်မာငလျင်အပြီး အပျက်အစီးတွေဆိုပြီး မှားယွင်းမျှဝေ

မြန်မာနိုင်ငံရဲ့ ဒုတိယအကြီးဆုံးမြို့တော်ဖြစ်တဲ့ မန္တလေးမြို့ဟာ ၂၀၂၅ ခုနှစ်၊ မတ်လ ၂၈ ရက်က လှုပ်ခတ်ခဲ့တဲ့ ကြောက်မက်ဖွယ်ငလျင်ကြောင့် အဆိုးရွားဆုံး ပျက်စီးမှုတွေကို ကြုံတွေ့ခဲ့ရပါတယ်။ ဒါပေမဲ့ ကမ္ဘာတစ်ဝှမ်းပျံ့နှံ့နေတဲ့ အပျက်အစီးဗီဒီယိုမှာ ရုပ်ပုံမှားယွင်းမှုတွေရှိပြီး ဉာဏ်ရည်တုနည်းပညာနဲ့ ဖန်တီးထားတယ်ဆိုတဲ့ အထောက်အထားတွေတွေ့ရပါတယ်။   

"ကြေမွကုန်ပြီ မန္တလေးရယ်" (မူရင်းအတိုင်း) ဆိုပြီး ငလျင်အပြီး နောက်တစ်နေ့မှာမျှဝေထားတဲ့ Facebook ဗီဒီယိုမှာရေးသားထားပါတယ်။   

ကြည့်ရှုမှုအကြိမ်ရေ ၁၁,၀၀၀ ကျော်ရှိတဲ့ ဗီဒီယိုမှာ ဝေဟင်ကနေရိုက်ကူးထားတဲ့ မြို့ပျက်နဲ့အတူ ဘုရားပုထိုးတွေကိုလည်း နောက်ခံမြင်ကွင်းမှာ တွေ့ရပါတယ်။  

ဗီဒီယိုထဲမှာလည်း မြို့ပျက်အလား ကြေမွကုန်ပါပြီ မန္တလေးရယ်ဆိုတဲ့ စာသားကိုထည့်သွင်းရေးသားထားပါတယ်။  

Image

မှားယွင်းတဲ့ Facebook ပိုစ့်ကို ၂၀၂၅ ခုနှစ်၊ ဧပြီလ ၁ ရက် ရယူထားတဲ့ Screenshot

မဂ္ဂနီကျု့ ၇ ဒဿမ ၇ ပြင်းအားရှိ ငလျင်လှုပ်ခတ်မှုကြောင့် မန္တလေးမြို့အတွင်း ပျက်စီးဆုံးရှုံးမှုသတင်းတွေ ထွက်ပေါ်လာချိန်မှာ တူညီတဲ့မှားယွင်းပြောဆိုမှုတွေနဲ့ ဗီဒီယိုကို မြန်မာဘာသာအပြင် တရုတ်၊ အင်္ဂလိပ်၊ အင်ဒိုနီးရှား၊ စပိန်၊ တမီးလ်၊ ထိုင်း၊ အူရဒူ စတဲ့ဘာသာစကားတွေနဲ့လည်း မျှဝေနေကြပါတယ်။  

၂၀၂၅ ခုနှစ်၊ ဧပြီလ ၃ ရက်နေ့မှာ စစ်အစိုးရက ငလျင်လှုပ်ခတ်မှုကြောင့် လူပေါင်း ၃,၀၈၅ ဦး သေဆုံးပြီး ၄,၇၁၅ ဒဏ်ရာရရှိခဲ့တဲ့အပြင် ၃၄၁ ဦးပျောက်ဆုံးနေဆဲဖြစ်တယ်လို့ ထုတ်ပြန်ကြေညာခဲ့ပါတယ်။ (Archived link)  

ငလျင်လှုပ်ခတ်မှုကြောင့် ဆက်သွယ်ရေးပြတ်တောက်နေတဲ့ နေရာတွေကို ကယ်ဆယ်ရေးသမားတွေ ရောက်ရှိလာပြီဖြစ်တဲ့အတွက် အတည်ပြုနိုင်တဲ့သေဆုံးသူအရေအတွက် သိသိသာသာမြင့်တက်လာနိုင်တယ်လို့ ခန့်မှန်းရပါတယ်။ 

ကီလိုမီတာရာနဲ့ချီဝေးကွာတဲ့ ဘန်ကောက်မြို့တော်မှာလည်း သေဆုံးသူဦးရေ ၂၀ အထိမြင့်တက်လာတယ်လို့ မြို့တော်အာဏာပိုင်တွေက ထုတ်ပြန်ထားပါတယ်။ သေဆုံးသူအများစုက ပြိုကျသွားတဲ့ အထပ် ၃၀ အမြင့်ရှိ ဆောက်လက်စအဆောက်အအုံတစ်ခုမှာ လုပ်ကိုင်နေတဲ့ အလုပ်သမားတွေပဲဖြစ်ပါတယ်။

မှတ်ချက်တွေအရ လူမှုကွန်ရက်အသုံးပြုသူတွေက ငလျင်လှုပ်ခတ်ပြီးနောက် အမှန်တကယ်ရိုက်ကူးထားတဲ့ ဗီဒီယိုဆိုပြီးယုံကြည်နေပုံရပါတယ်။  

"ရင်တွေလည်းကွဲပါပီ မန်းလေးရယ်" (မူရင်းအတိုင်း) ဆိုပြီး အွန်လိုင်းအသုံးပြုသူတစ်ယောက်က မှတ်ချက်ပြုထားပါတယ်။ "မြို့တစ်မြို့လုံးလိုလိုရစရာကိုမရှီဟူးနော်"(မူရင်းအတိုင်း) ဆိုပြီးလည်းအခြားတစ်ယောက်ကရေးသားထားပါတယ်။  

'Wan AI နဲ့ဖန်တီးထားတဲ့ ဗီဒီယို'

ဗီဒီယိုကရုပ်ပုံတွေအသုံးပြုပြီး Google မှာဓာတ်ပုံရာဇဝင်ရှာဖွေကြည့်တဲ့အခါ ၂၀၂၅ ခုနှစ်၊ မတ်လ ၂၉ ရက်က ထပ်တူနီးပါးရှိတဲ့ ဗီဒီယိုကို X မှာမျှဝေထားတာတွေ့ခဲ့ရပါတယ်။  ပိုမိုကြည်လင်တဲ့ ဗီဒီယိုမှာ AI နည်းပညာနဲ့ ဖန်တီးထားတယ်ဆိုပြီး စာသားဖော်ပြထားတာမျိုးမရှိပေမဲ့ ညာဘက်အောက်ခြေထောင့်မှာ Wan AI ရဲ့ရေစာအမှတ်အသားကို တွေ့နိုင်ပါတယ်။ (Archived link) 

Image

ဗီဒီယိုရဲ့ ညာဘက်အောက်ခြေထောင့်က ရေစာအမှတ်အသားကို AFP က မြင်သာအောင်အမှတ်အသားပြုထား

မြင်သာတဲ့ကွဲလွဲမှုတွေက AI နည်းပညာနဲ့ ဖန်တီးထားတာကိုညွှန်ပြနေတယ်လို့ ကျွမ်းကျင်သူတွေရဲ့ အဆိုအရသိရပါတယ်။  

Purdue တက္ကသိုလ် Machine Learning and Media Forensics Lab ရဲ့  ညွှန်ကြားရေးမှူး Shu Hu က ဗီဒီယိုထဲမှာပါတဲ့ သစ်ပင်က မြင်သာတဲ့ ပင်စည်အမြစ်တွေမရှိတဲ့အပြင် လမ်းလျှောက်နေတဲ့လူကလည်း သဘာဝအတိုင်းရွေ့လျားမှုနဲ့ဆန့်ကျင်နေတယ်လို့ AFP ကိုပြောကြားခဲ့ပါတယ်။ (Archived link) 

အမေရိကန်ပြည်ထောင်စု၊ Buffalo တက္ကသိုလ်၊ Media Forensics Lab  ရဲ့ ညွှန်ကြားရေးမှူးဖြစ်သူ Siwei Lyu ကလည်း Wan AI ရဲ့ရေစာကို သီးခြားထောက်ပြခဲ့တဲ့အပြင် ဗီဒီယိုထဲက အရာဝတ္ထုတွေရဲ့ အရိပ်ကလည်း ဦးတည်ရာအပြင် အရွယ်အစားနဲ့ပါ ကိုက်ညီခြင်းမရှိဘူးလို့ဆိုပါတယ်။ (Archived link) 

Image

မျက်မြင်ကွဲလွဲချက်တွေကို Shu Hu (ဘယ်) နဲ့ Siwei Lyu (ညာ) တို့က မြင်သာအောင်အမှတ်အသားပြုထား

AI နည်းပညာနဲ့ဖန်တီးထားတဲ့ မီဒီယာတွေကို စစ်ဆေးနိုင်ဖို့ စိတ်ချရတဲ့နည်းလမ်းတွေ မရှိသေးပေမဲ့ တရှိန်ထိုးမြင့်မားလာတဲ့ AI နည်းပညာက ချို့ယွင်းချက်တွေရှိနေသေးတာကြောင့် ရေစာနဲ့ မြင်သာတဲ့ကွဲလွဲမှုတွေကို ရှာဖွေအတည်ပြုတာက အထောက်အကူဖြစ်စေနိုင်ပါတယ်။  

AFP အနေနဲ့ မြန်မာငလျင်နဲ့ ပတ်သက်တဲ့ အချက်အလက်မှားတွေကို ဒီလင့်ခ်မှာ အချက်အလက်စိစစ်ခဲ့ပါတယ်။