ကြက်သွန်ဖြူနဲ့ ကွမ်းရွက်က သွေးတိုး နဲ့ ဆီးချိုကျစေတယ်ဆိုတာကို ကျွမ်းကျင်သူတွေ ငြင်းဆို

"ကွမ်းရွက်တစ်ရွက်မှာ ကြက်သွန်ဖြူ (၅) တက် ထည့်ပြီး ညက်အောင် ဝါးစားပြီး မြိုချလိုက်ပါ။ ပြီးရင် ရေအနည်းငယ်သာ သောက်ပါ။ ခဏနေရင် သွေးတိုးဆီးချို အံ့အားသင့်ဖွယ် ကျသွားပါမယ်။" (မူရင်းအတိုင်း) ဆိုပြီး ၂၀၂၅ ခုနှစ်၊ သြဂုတ်လ ၂၀ ရက်က မျှဝေထားတဲ့ ဒီ Facebook ပိုစ့်မှာ တစ်စိတ်တစ်ပိုင်းရေးသားထားပါတယ်။ 

"ရက်ရှည် သောက်သွားရင် သွေးတိုးဆီးချိုက bye bye ဆိုပြီးနှုတ်ဆက် ထွက်ပြေးသွားပါ လိမ့်မယ်ရှင့်။" (မူရင်းအတိုင်း) ဆိုပြီးလည်း ဆက်လက်ရေးသားထားပါတယ်။ 

ကွမ်းရွက်တွေပေါ်မှာတင်ထားတဲ့ ကြက်သွန်ဖြူ ငါးမွှာရဲ့ဓာတ်ပုံကို ပိုစ့်မှာဖော်ပြထားပါတယ်။  

Image

၂၀၂၅ ခုနှစ်၊ သြဂုတ်လ ၂၆ ရက်က ရယူထားတဲ့ မှားယွင်း Facebook ပိုစ့်ရဲ့ Screenshot ကို AFP က X အမှတ်အသားပြုလုပ်ထား

ဒီမှားယွင်းပြောဆိုမှုဟာ လူမှုကွန်ရက်ပေါ်မှာ အနည်းဆုံး ၂၀၂၁ ခုနှစ်လောက်ကတည်းက ပျံ့နှံ့နေတာဖြစ်ပါတယ်။ 

ဒါပေမဲ့ ကြက်သွန်ဖြူနဲ့ ကွမ်းရွက်ကို ဝါးစားတာက ဆီးချိုနဲ့ သွေးတိုးရောဂါကို ကုသနိုင်တယ်ဆိုတဲ့ သိပ္ပံနည်းကျ အထောက်အထားမရှိဘူးလို့ ကျွမ်းကျင်သူတွေကဆိုပါတယ်။  

"ကြက်သွန်ဖြူက သွေးဖိအားကို အနည်းငယ်ကျဆင်းနိုင်ချေရှိပေမဲ့ သွေးတိုးရောဂါကို ကုသလို့တော့မရပါဘူး။ ကွမ်းရွက်ကလည်း သွေးတိုးနဲ့ ဆီးချိုကို ကုသနိုင်တယ်ဆိုတဲ့ သက်သေပြချက်မရှိပါဘူး" ဆိုပြီး ဟောင်ကောင်တက္ကလိုလ်၊ ပြည်သူ့ကျန်းမာရေးဆိုင်ရာ ဆေးပညာဌာနရဲ့ ကထိကတစ်ဦးဖြစ်သူ ဒေါက်တာ ဖြူဖြူသင်းဇော်က ၂၀၂၅ ခုနှစ်၊ သြဂုတ်လ ၂၁ ရက်မှာ အီးမေးလ်ကတဆင့် AFP ကိုပြောပါတယ်။ (Archived link) 

ဆေးဖက်ဝင်အပင်တွေက သင့်တော်တဲ့ဆေးကုသမှုတွေကို အစားထိုးနိုင်တာမျိုးမရှိဘူးလို့ သူမကဆိုပါတယ်။ 

မြန်မာကျန်းမာရေးစောင့်ရှောက်မှုဆိုင်ရာဝဘ်ဆိုဒ်တစ်ခုဖြစ်တဲ့ Hello Sayarwon ရဲ့ Country Manager ဒေါက်တာ သူရိန်လှိုင်ဝင်းကလည်း ကြက်သွန်ဖြူနဲ့ ကွမ်းရွက်က သွေးတိုးနဲ့ ဆီးချိုကို ကုသနိုင်တယ်ဆိုတဲ့ပြောဆိုမှုကို ၂၀၂၅ ခုနှစ်၊ သြဂုတ်လ ၂၂ ရက်က အီးမေးလ်ကနေတဆင့် ငြင်းဆိုခဲ့ပါတယ်။ အဲဒီနည်းလမ်းတွေက မှန်ကန်တဲ့ ကုသမှုတွေကို နှောင့်နှေးစေနိုင်ပြီး သွေးပေါင်ချိန်နဲ့ သွေးတွင်းသကြားဓာတ်ပမာဏတွေဟာ အန္တရာယ်ရှိနိုင်တဲ့အခြေအနေအထိ မြင့်တက်သွားစေနိုင်တယ်လို့ ထပ်မံပြောကြားခဲ့ပါတယ်။ (Archived links here and here)   

"ဒီလိုထိန်းချုပ်နိုင်စွမ်းမရှိတော့တဲ့ အခြေအနေတွေမှာ နှလုံးဖောက်ခြင်း၊ လေဖြတ်ခြင်း၊ ကျောက်ကပ်ပျက်စီးခြင်းနဲ့ အမြင်အာရုံဆုံးရှုံးခြင်းတို့အပါအဝင် အသက်အန္တရာယ်ရှိတဲ့ နောက်ဆက်တွဲဆိုးကျိုးတွေဖြစ်ပေါ်လာနိုင်ချေကို သိသိသာသာမြင့်မားလာနိုင်စေပါတယ်" လို့ သူကဆိုပါတယ်။  

အမေရိကန်ရောဂါထိန်းချုပ်ရေးနဲ့ ကာကွယ်ရေးစင်တာအပြင် စင်ကာပူအထွေထွေရောဂါကုဆေးရုံကြီးရဲ့ အဆိုအရ ဆီးချိုနဲ့ သွေးတိုးရောဂါတွေကို အမြစ်ပြတ်အောင်ကုသနိုင်တာမျိုးမရှိပေမယ့် ညီညွတ်မျှတတဲ့ နေထိုင်စားသောက်မှုပုံစံနဲ့ ပုံမှန်လေ့ကျင့်ခန်းပြုလုပ်ပြီး ကိုယ်အလေးချိန်ထိန်းသိမ်းတာက သွေးပေါင်ချိန်ကိုရော သွေးတွင်းသကြားဓာတ်ကိုပါ ပုံမှန်အခြေအနေမှာရှိနေဖို့ ကူညီပေးပါတယ်။ (Archived links here and here)   

ဆီးချိုဝေဒနာရှင်တွေအတွက် အင်ဆူလင်အပါအဝင် လက်လှမ်းမီတဲ့ ကုသမှုရရှိနိုင်ရေးက အရေးကြီးတယ်လို့ ကမ္ဘာ့ကျန်းမာရေးအဖွဲ့ (WHO) ကဆိုပါတယ်။ (Archived link)   

ဆေးမြီးတိုကုထုံးတွေနဲ့ ပတ်သက်တဲ့ မှားယွင်းပြောဆိုမှုတွေကို AFP က ဒီလင့်ခ်၊ ဒီလင့်ခ် နဲ့ ဒီလင့်ခ်တွေမှာ အချက်အလက်စိစစ်ထားပါတယ်။