'Manaus မြို့နဲ့ အမေဇုန်တောတို့ဆုံရာ'လို့ဆိုတဲ့ ဝေဟင်ကရိုက်ကူးထားတဲ့ ဓာတ်ပုံဟာ AI ဖန်တီးမှုသာဖြစ်
- ပုံနှိပ်ဖော်ပြသည့်နေ့စွဲ 21 မတ် 2025 အချိန် 09h31
- ဖတ်ရန် ကြာချိန် 4 မိနစ်
- Chayanit ITTHIPONGMAETEE, AFP ထိုင်း
- ဘာသာပြန်ခြင်းနှင့် ဆီလျော်အောင်ပြန်လည်ရေးသားခြင်း - AFP ထိုင်း
AFP © မူပိုင်ခွင့် ၂၀၁၇-၂၀၂၅။ ဤစာမူကို စီးပွားဖြစ် အသုံးပြုမည်ဆိုပါက လစဉ်/နှစ်စဉ်ကြေး ပေးသွင်းရန် လိုအပ်ပါသည်။ ပိုမိုသိရှိရန် ဤနေရာကို နှိပ်ပါ။
"ဘရာဇီးနိုင်ငံရဲ့ အသည်းနှလုံး မြို့ပြနဲ့သစ်တော Manaus မြို့နဲ့ အမေဇုံ မိုးသစ်တောကြီးရဲ့ ထိစပ်နေမှုကြီး" (မူရင်းအတိုင်း) ဆိုပြီး ၂၀၂၅ ခုနှစ်၊ မတ်လ ၁၇ ရက်က မျှဝေထားတဲ့ ဒီ Facebook ပိုစ့်မှာရေးသားထားပါတယ်။
အမေဇုန်မိုးသစ်တောရဲ့ အလယ်မှာရှိတဲ့ Manausမြို့ဟာ ဘရာဇီးနိုင်ငံ Amazonas ပြည်နယ်ရဲ့ အကြီးဆုံးမြို့ဖြစ်သလို မြို့တော်လည်းဖြစ်ပါတယ်။ (Archived link)
ပြန်လည်မျှဝေမှုအကြိမ်ရေ ၁,၇၀၀ ကျော်ရှိတဲ့ပိုစ့်မှာ ဝေဟင်ကနေမြင်ရတဲ့ မြို့ပြနဲ့ မိုးသစ်တောတို့ဆုံရာ မြင်ကွင်းကို တွေ့နိုင်ပါတယ်။
တူညီတဲ့မှားယွင်းပြောဆိုမှုနဲ့ ဓာတ်ပုံတွေကို မြန်မာဘာသာနဲ့ ထိုင်းဘာသာတို့အပြင် အခြားဘာသာစကားတွေနဲ့လည်း မျှဝေနေကြပါတယ်။
"သစ်တောရဲ့တန်ဖိုးကိုနားလည်ထိန်းသိမ်းရကောင်းမှန်းးလည်းးသိထားသူတွေ အံ့မခန်းပါ။" (မူရင်းအတိုင်း) ဆိုပြီး လူမှုကွန်ရက် အသုံးပြုသူတစ်ဦးက မှတ်ချက်ပြုထားပါတယ်။
"တစ်ဖက်မှာကလူသားတွေနေထိုင်ကျတယ်တစ်ဖက်မှာလဲတရိဆ္ဆန်တွေနေကျတယ်ပျော်စရာကြီး"(မူရင်းအတိုင်း) ဆိုပြီးလည်း အခြားတစ်ယောက်က ရေးသားထားပါတယ်။
ဒါပေမဲ့ အဲဒီဓာတ်ပုံကို ဉာဏ်ရည်တုနည်းပညာ (AI) နဲ့ ဖန်တီးထားတာပဲဖြစ်ပါတယ်။
Google ရဲ့ AI နည်းပညာနဲ့ ဖန်တီးထားတဲ့ပုံ
Google မှာ ဓာတ်ပုံရာဇဝင်ရှာဖွေကြည့်ရာ တူညီတဲ့ဓာတ်ပုံကို မျှဝေထားတဲ့ အခြားပိုစ့်များစွာကို တွေ့ခဲ့ရတဲ့အပြင် ဝဘ်ဆိုဒ်ရဲ့ "About this image" ဆိုတဲ့ စာတမ်းကို နှိပ်လိုက်ရာ မူရင်းဓာတ်ပုံကို Google ရဲ့ AI နည်းပညာကိုအသုံးပြုပြီး ဖန်တီးထားတယ်ဆိုတဲ့ ရည်ညွှန်းချက်ကို တွေ့ခဲ့ရပါတယ်။
Google ရဲ့ ပြောရေးဆိုခွင့်ရှိသူတစ်ဦးက ပျံ့နှံ့နေတဲ့ ဓာတ်ပုံမှာ SynthID ရဲ့ ရေစာအမှတ်သားကို တွေ့ရပြီး ဒါဟာ "AI နည်းပညာနဲ့ ဖန်တီးထားတာ ဒါမှမဟုတ် ပြုပြင်မွမ်းမံထားတာကြောင့်ဖြစ်တယ်" လို့ AFP ကို ပြောပါတယ်။
၂၀၂၃ ခုနှစ်မှာ Google ရဲ့ AI lab က ဖန်တီးထားတဲ့ SynthID ဟာ ဒစ်ဂျစ်တယ်ရေစာထုတ်လုပ်မှုအပြင် Google AI နဲ့ဖန်တီးထားတဲ့ ဓာတ်ပုံတွေကို စမ်းသပ်ထုတ်ဖော်မှုတွေပြုလုပ်ပေးတဲ့ ပရိုဂရမ်တစ်ခုဖြစ်ပါတယ်။ (Archived links here and here)
"SynthID ကဒီလိုပြဿနာတွေကို ဖြေရှင်းနိုင်ဖို့ အဓိကရည်ရွယ်တာပဲဖြစ်ပါတယ်။ အခုလိုမျိုးကောင်းမွန်စွာ အသုံးချနေတာကိုတွေ့ရတဲ့အတွက်လည်း ဝမ်းသာပါတယ်။" ဆိုပြီး ပြောရေးဆိုခွင့်ရှိသူက ၂၀၂၅ ခုနှစ်၊ ဇန်နဝါရီလ ၂၈ ရက်မှာ email ကနေတစ်ဆင့်ပြောကြားခဲ့ပါတယ်။
နည်းပညာနယ်ပယ်က ကျွမ်းကျင်သူတွေကလည်း ဓာတ်ပုံကို AI နဲ့ ဖန်တီးထားတဲ့ လက္ခဏာတွေတွေ့ရတယ်လို့ ဆိုပါတယ်။
Purdue တက္ကသိုလ် Machine Learning and Media Forensics Labရဲ့ ညွှန်ကြားရေးမှူး Shu Hu က ဓာတ်ပုံမှာပါတဲ့ မော်တော်ယာဉ်တွေက "အဖြူရောင်တွေချည်းပဲဖြစ်နေပြီး" "တကယ့်လက်တွေ့မှာ မဖြစ်နိုင်တဲ့ ကွဲလွဲချက်တွေဖြစ်တယ်" လို့ပြောကြားခဲ့ပါတယ်။ (Archived link)
"မော်တော်ယာဉ်တွေရဲ့ အောက်မှာ အရိပ်ထင်ခြင်းမရှိ"တဲ့အပြင် "အဆောက်အဦးတွေရဲ့ အရိပ်တွေကလည်း တိကျတဲ့ ပုံသဏ္ဌာန်မရှိဘူး"လို့ ထောက်ပြခဲ့ပါတယ်။
အမေရိကန်ပြည်ထောင်စု၊ Buffalo တက္ကသိုလ်၊ Media Forensics Lab (UB MDFL) ရဲ့ ညွှန်ကြားရေးမှူးဖြစ်သူ Siwei Lyu ကလည်း အဆောက်အဦးတွေရဲ့ လွဲမှားနေတဲ့ ပြတင်းပေါက်တွေ အပါအဝင် အခြားမျက်မြင်ကွဲလွဲမှုတွေကို ထောက်ပြခဲ့ပါတယ်။ (Archived link)
Manaus မြို့ရဲ့ ဓာတ်ပုံအစစ်
Manaus မြို့ကို ရိုက်ကူးထားတဲ့ AFP ဓာတ်ပုံတွေက မှားယွင်းမျှဝေထားတဲ့ ဓာတ်ပုံနဲ့ ဆင်တူပေမဲ့လူနေအိမ်တွေနဲ့ မိုးသစ်တောကို ပိုင်းခြားထားတဲ့ အဆောက်အဦးတွေကတော့ တူညီခြင်းမရှိပါဘူး။
Google Earth ရဲ့ satellite နဲ့ street view ပုံတွေကနေ မြိုပြရဲ့ နယ်စပ်မျဉ်းမှာရှိနေတဲ့ အဆောက်အဦးတွေက မှားယွင်းတဲ့ပိုစ့်ရဲ့ အထပ်မြင့်အဆောက်အဦးတွေနဲ့ ဘယ်လိုကွာခြားလဲဆိုတာကို တွေ့နိုင်ပါတယ်။
AFP အနေနဲ့ ယခင်ကလည်း Google AI နည်းပညာကို အသုံးပြုပြီးဖန်တီးထားတဲ့ အခြား AI ဓာတ်ပုံတွေကို အချက်အလက်စိစစ်ခဲ့ပါတယ်။
AFP အား အချက်အလက်စိစစ်စေလိုသည့်အကြောင်းအရာ သင့်ထံမှာ ရှိပါသလား။
ကျွန်ုပ်တို့ကို ဆက်သွယ်ရန်
